مخادع وضحية
هاني آدم
السيرة أطول من العمر
لسه فيا نفس أعافر
قرد سافر ع الشجر
مؤمن بوصوله بر أمان
مهما كان الليل طويل
ميل براحتك بس حاسب
تلمس الأرض بكتافك
إللي شافك و إنت مكسور
مش مصدق لك قيام
عام على شطوط المحبه
و طب حبه و طار من تانى
اسمه هاني و عمر حد ما هان عليه
طبعه صعب و سهل جداً تفهموه
غايته وصل التوبة بتلال الذنوب
و راسه طول العمر مرفوعة للسما
بينما الأيام تكشر تلقى صبر
و جبر خاطر الطيبين عهدة إلاه
آه بتلبس توب فرح و تعيش حزينة
مينا كل البحارين فيها غرقانين
سين و جيم و هموم بالكوم
تدوم بتتحمل يا غاوي السكنى فى عيون الحبايب
تعيش و تفتكر إللى راحوا
و إللى باحوا بكل كلمة
بتوصف الشوق و الحنين
و المذلة و المهانة
تعيش و تفتكر إللي غابوا
فى عز وجودهم
تعيش و تفتكر إللي ماتوا و لسه عايشين
لحد ما يجيلك معاد الانصراف
ع العهد عمر ما مخلص خاف
لحظة فراق
الخوف من الوحدة فى كابوس
بعد المشتاق
عن كل حاجة ليها بيشتاق
