سجن بلا قضبان
حنان مرسي
كان فيه بني آدم أحلامه وردية
نجاح وحب… صحبة حلوة… والدمعة منسية
عافر وكافح …..أخلص و سامح
لكنه في لحظة واجه حقيقة مرة…والكل جارح
صدمته الدنيا… لا سمت ولا صلت…. لكنهاغدرت
وكأنه سقط من جبل عالي
وعينه لم تدوق النوم أيام وليالي
كان بيكلم نفسه قدام مرايته يا ولداه
عاش وحدته جوة زحمته
………..
قالوا المداوية قول لنا ايه احساسك فضفض
انطق أو اكتب في كراسك
مسك القلم وكتب حروف اتغرقت دموع وألم
كان حديث قاسي وجهه لنفسه وهو بيآسي
جربت تكون محبوس جوة نفسك
مربوط الأيدي و الأرجل رغم إنك حر الحركة
صريخك بدون صوت ودموعك شئ مش محسوس
عقلك وقلبك حرارتهم أشد من نار المجوس
وأيامك أصبحت كابوس
شايف الناس ضباب ….كل اللي حواليك سراب
الكل بيجري ويتنطط……وانت مش قادر تقرّب
واقف واقدامك ثابتةعلى الأرض ومن القدر ما في مهرب
أصلي أخلصت وما فهموش …وفيت ومقدروش
أعطيت وما خدوش…..اتوجعت وماحسوش
…………
اتعجبوا المداوية من اللي دمر نفسه بشهادة الجلوس
وجهوا ليه اللوم وأصدروا الحكم المدروس
بتحلم تلاقي يوتوبيا يا مهووس
دي أضغاث أحلام….. معلش ربك أعلم بالنفوس
بين الصح والغلط عشت حاير تايه بين قوسين منبوذ
وبين الأحبة ليك عدو مدسوس
بتكلم نفسك رغم انك مش ملبوس
أعطيت كل الحب اللي عندك لحد ماأصبحت فاضي
ضحيت بكل اللي حيلتك ودلوقتي مش راضي
الخطأ خطأك…. شيل وانت هادي
واتعلم الدرس المرة دي.
ونفذ حكم القاضي.
