الضلمة قرار
هاني آدم
أنا مش نزار
و لا ضفر من رجل الفاجومى
فى الثوره طار
أنا كوكتيل عشق
حلاوته مرار
بلقيس ندهتنى بكبرياء
رديت وجع
عينى ع الجدع
فى شراك وجع
و اللهجه فضحت بدله خدها إيجار جديم
تار بايت بينه
و بين جلابيت عبد الجبار
عصير كتب
فى حضاره عماله تحتضر
منديل محلاوى إتعصر
نزل ثوار
العندليب علمنى إيه معنى الهوى
و جويده فى الدم إستعمار
كان كل حلمى
ديوان يترجم لغوتى
دليل يقول للناس على طيف
كان حلمه نهار
و صراخ صبى يقلق منامى و يعتذر
على غربه طالت بينه و بين
غريب الدار
مفطوم على وداع الأحبه فى سكتى
و جينات أيوب
بتصبر ليل و بتطفى نهار
الكلمه أمانه و عمرى ما خونت وعودى ليها
لكن الموجود
مش دايما زاده قد المشوار
ورده و حرموها من ألوانها
من أشجانها
غصبوها فى الوهم تكون صبار
كان حلمى ألملم تفاصيل روح
و أزرعها في سطر
حبيبتى مدار
ما حلمتش غنوتى يسمعها و يقراها كتير
لكن الفوازير
عقدت نبه تهد هدايتى
و تفوتنى ضرير
سرقوا العكاز من غير ما يشوفهم أصله ضرير
و الضلمه قرار