حلم متشعبط

هاني آدم

يا حلم متشعبط فى حبل و داب

مين اللى ساب الحبل ع الغارب

وارب فى باب الحلم دخل النور

مسحور بضل الفتنه و الأمنيه

يا مغربه العاشق عن المعشوق

الشوق ببفرض نفسه فرض كفايه

نهايه لسه الوعد ما كتبهاش

و لا جاش فى مره و سمى فى الملتقى

إعقل بقى يا موحد اللهفه

هافه عليك النظره بالعافيه

لكن النصيب ثابت على المبدأ

من إمتى كان الحلم متحقق

من إمتى نال كل اللى يتمنى

و استنى يوصل كل عاشق روح

البوح ده بس عشان ما اموتش فطيس

و تهيص فى روحى فرحة الملتقى

إعقل بقى يا مصدق اللى اتقال

و اتشال فى ننى العين يا حلم محال

الكنز مش فى الحضن و لا فى الوصول

الكنز فى إيمانك بصدق هواك

تنساك و تهجر بس لسه هناك

حاجه من ريحتها بتلعن التوهه

ندمانه على بعد إتفرض ع الروح

و بتستخبى من الوداع فى حروف

كتبها ليها الواد و كان بيطوف

بالمعنى داعى الحلم يتحقق

و لا عمره مره زهق من المبدأ

إقرأ أيضاً:

أنا وجدي

سجين

صنيعة القدر