أحمد السعدني لحبر سري: “العمل المصري هو سفير الفن في كل الدول العربية”

تقرير/ هاجر زينهم

استضافت أمس الإعلامية “أسماء إبراهيم” مقدمة برنامج “حبر سري”، المذاع على قناة القاهرة والناس في تمام الساعة 6:20 مساءً ، الفنان “أحمد السعدني”.

يرصد لكم موقع “رؤية وطن” في السطور التالية أهم وأبرز تصريحات أحمد السعدني لخبر سري:

 

السعدني عن عادل إمام: “لا يتنازل ولا يتهاون في عمل”

وعن إشاعة عمله مع الزعيم عادل إمام لأنه صديق مقرب من والده.. قال “السعدني”: “الأستاذ عادل إمام لا يتنازل ولا يتهاون في عمل يعني الدور ده مش مناسب لأحمد عمره ما هيجيبه، وأول مرة أشتغل مع الزعيم كان في فيلم عريس من جهة أمنية”.

 

 

وتابع “السعدني” قائلاً: “كان دور صغير أوي وأنا كنت مبسوط أوي أني هشتغل مع الأستاذ عادل إمام، وقبل التصوير بيومين رجلي انكسرت، بس ده حسن حظ لأني مش عملت الدور ولكن عملت دور حلو أوي في فيلم مرجان أحمد مرجان، وهو مدرسة ويمكن كده قليل عليه هو جامعة، وأنا أستفدت منه إستفادة غير عادية، على جميع المستويات، وهو دماغه كلها شغل وفاهم أدق التفاصيل.

 

واسترسل حديثه عن أعماله مع الزعيم، قائلاً: “لما بروح أي دولة عربية الناس معلق معاهم مسلسل فرقة ناجي عطا الله، وفيلم مرجان أحمد مرجان لأنهم مع الأستاذ عادل لأنه أهم نجم جاء في تاريخ مصر”.

 

السعدني لحبر سري: “لو أبويا مش صلاح السعدني ماكنتش هبقى ممثل”

وعن بداياته في الوسط قال “أحمد”: “لو أبويا مش صلاح السعدني ماكنتش هبقى ممثل، كان ممكن مايجيش في بالي التمثيل، ولو قولت أني بدأت من غير واسطة محدش هيصدقني لأن أول حاجة أعملها كانت مع أبويا، بس أنا حقيقي ما بدأتش التمثيل بالواسطة، الدور ده كان بيعمله أحمد زاهر واعتذر قبل التصوير بيومين، وكان الدكتور عصام الشماع بيحضر مع أبويا المسلسل، وكان بيجي البيت كتير.

 

 

وتابع “السعدني” قائلاً: “ووقتها كنت في كلية فنون مسرحية، وأستاذ عصام قرأ معايا مشهدين وشاف أن أنا مناسب للدور وأبويا ماكنش يعرف ولما عرفه أستاذ عصام بمشاركتي قاله تولى أنت مسئوليته” 

 

أحمد عن شائعات وفاة والده: “موضوع ترافيك شاغل بال أغلب الناس الفاضية”

وعن كثرة الشائعات حول وفاة العمدة صلاح السعدني، قال: “مش بس بابا لكن لنجوم كتير، هتلاقي موضوع الترافيك أني أشير حاجة فيتعمل شير كتير وكومنتات كتير وتجيب فلوس ده اللي شغال أغلب الناس الفاضية، ودي حاجة مزعجة أوي”.

 

 

وكشف عن موقف تعرض له بسبب تلك الشائعات، قائلاً: “مرة حصل مشكلة مع أكرم حسني وأنا بحبه أوي ولكن البيدج الرسمية بتاعته شيرت إشاعة زي دي، ووقتها طلعت في فيديو لايڤ ونفيت الإشاعة، وأكرم كلمني يعرف حاجة عن الموضوع وأن اللي نشر المسئولين عن إدارة البيدج”.

 

أحمد السعدني عن غياب والده فنيًا: “أكتفى والسلام النفسي أهم من الفلوس”

وعن صلاح السعدني، قال: “بابا أخد قرار من أخر عمل له مسلسل القاصرات أنه أكتفى، وأنا لو اقدر أخد القرار ده بكرا كنت عملت كده ومش لها علاقة بالكسل، ولكن السلام النفسي أهم من الفلوس، فكرة العمل نفسها مرهقة ولكن العمل عبادة”.

 

السعدني عن نصائح والده: “لا تدور على شهرة ولا مال ولا نجومية وأهم حاجة حب الناس والموهبة”

وعن نصائح صلاح السعدني له، قال: “أنا عايش بنصائحه، وأول نصيحة قالها لي وعمري ما أنساها، عمرك ما تدور على شهرة أنت مشهور من صغرك، ولا تدور على فلوس أنا عمري ما حرمتك من حاجة، ولا تدور على فكرة النجومية لأن اللي بيعيش حاجتين حب الناس ودي أهم حاجة والموهبة”.

 

 

السعدني لحبر سري: “العمل المصري هو سفير الفن في كل الدول العربية”

وعن تراجع صدارة الفن والسينما المصرية لصالح الفن في دول عربية تانية، قال “السعدني”: “هي لم تتراجع، وخلينا نكون صادقين السعودية كلنا شايفين أن في نهضة ثقافية وفنية حقيقية ولكن بنسبة 95٪ معتمدة على الفن المصري، وهيفضل العمل المصري هو سفير الفن في كل الدول العربية”.

 

 

وتابع قائلاً: “لكن رأيي أنا الشخصي أن عندنا في مصر لازم أفكار روتينية كتير أوي من ناحية معوقات التصوير، وأنا شايف أن لازم يكون في تعاون حقيقي بين وزارة الثقافة ووزارة السياحة ووزارة الصناعة وتسهيل إجراءات التصوير لإنتاج أعمال فنية أكتر، والسماح لأفلام أجنبية في مصر”.

 

 

وعن تصريحه بأنه دائمًا كسلان، وهل هذا أضاع منه فرص مهمة، قال “السعدني”: “لا أنا كسلان طول ما أنا فاضي ومفيش إلتزام، بعطي كل حاجة حقها”.

 

السعدني عن قلة ظهوره فنيًا: “مراهقة فنية وكل واحد بيأخذ نصيبه ومش بالكثرة”

وعن قلة ظهوره فنيًا، قال: “لا مش مقصر في حق نفسي، أنا أول ما بدأت من 20 سنة جالي ردود أفعال حلوة أوي وبعدها لمدة 3 سنين مفيش ولا عمل أتقدم لي الحكاية مش في إيدي، بعد كده لما جيت أشتغل وأنا صغير شويه كان عندي مراهقة فنية شويه بمعنى أني مش هعمل حاجة غير وهي عجباني أوي، وفي حاجات حسبتها غلط، بس في النهاية أنا مقتنع أن كل واحد بيأخذ نصيبه ومش بالكثرة، كان ممكن أقدم الأعمال اللي رفضتها وتطلع وحشة أو تقلل من رصيدي، وعمري ما فكرة في الانتشار بالطريقة دي، لازم يكون الدور عاجبني دي أول حاجة”.

 

السعدني عن مسلسل الباطنية: “ندمت أني ماعملتش الدور وكنت غبي”

وعن اعتذاره عن تقديم دور في الباطنية قال “السعدني”: “أنا ندمت جدًا أني ماعملتش الدور ده، كنت عايز أشتغل ما أبويا أكتر من كده وكان دور حلو جدًا وعمل مميز، والسبب أن دي كانت مراهقة في التفكير، كل مرحلة ولها دماغها وطريقة تفكيرها، كنت غبي”.

 

 

أحمد السعدني لحبر سري: “مؤمن أن كل تجربة الإنسان بيتعلم منها”

وعن المسلسل الذي ندم على تقديمه، قال “السعدني”: “أنا الحمدلله مش بندم لأن أنا مؤمن أن كل تجربة الإنسان بيتعلم منها، وأن التجربة الوحشة بنتعلم منها أكتر من التجربة الكويسة، ومسلسل كله بالحب تجربة سيئة جدًا ولكن استفدت منها، أن مش أمضي على ورقة في غياب مراجع قانوني لأني بتعامل بحسن نية لدرجة أني بمضي على ورق من غير ما اقرأه، تاني حاجة الجواب بيبان من عنوان”.

 

 

السعدني عن فكرة برنامج 30 يوم في طرة: “فكرته كانت حلوة بس حسيت أنه مش مناسب لي”

وعن عدم خروج ظهور 30 يوم في طرة، قال: “كان برومو بس واتفقنا عليه وكان إخراج حسام الحسيني وكان لسه في أول ظهوره، فكرته كانت حلوة أوي وكان هيتنفذ بشكل حلو، وأنا نفسي أعمل برنامج بس حسيت أنه مش مناسب لي بس الإحساس ده جالي متأخر أوي كنا صورنا البرومو وكنا هنصور البرنامج بعده بخمسة أيام، كان بعد الثورة وكان سياسي والديكور كان على شكل سجن، وحسيت أنه مظلم أوي وتقيل والفترة دي الناس ماكنتش مستحملة، وأنا بحب اللايت”.

 

 

وعن تفكيره في تقديم برامج قال: “أحب أقدم حاجة مجنونة، لذيذة ودمها خفيف”.

وعن تعليقه الساخر على فستان رانيا يوسف حيث قال أنها تريد أن تثبت أن الدنيا ماشية بظهرها، قال: “أولاً رانيا صاحبتي جدًا، كنت بهزر لأن إحنا ما بنصدق نلاقي فضيحة أو مشكلة عشان نتكلم بقلة أدب، ومستحيل تكون زعلت مني وكلمتها ساعتها عشان أثبت حسن نيتي وهي قالت لي أنها مش زعلانة”.

 

 

السعدني ينفي خلافه مع شريف سلامة: “العقد شريعة المتعاقدين”

وعن حقيقة خلافه مع شريف سلامة بسبب بوستر فيلم سوء تفاهم، قال “السعدني”: “دائمًا شايف أن العقد شريعة المتعاقدين، ولو أنا مشترط في العقد على مكان اسمي في التتر أو الأفيش وما تنفذش ساعتها يكون في مشكلة، لكن لو أنا مش مشترط مش بركز خالص لأن مصلحة المنتج ودور العرض و المحطة أو black form، ولكن مفيش أي مشاكل بينا”.

 

 

السعدني عن ياسمين عبدالعزيز: “الأنجح تجاريًا والوحيدة اللي حققت الإيرادات دي”

وفي فقرة ملكش عزيز، كان أول سؤال أن يختار من بين “ياسمين عبدالعزيز، منى زكي، ياسمين صبري” نجمة مصر الأولى، قال: “نبيلة عبيد، لأن ده لقبها، لكن دلوقتي بالنسبة لي ولجيلي وللجيل اللي بعده منى زكي أيقونة، وياسمين عبدالعزيز هي الأنجح تجاريًا، الأفلام في السينما ياسمين عبدالعزيز هي الممثلة الوحيدة اللي حققت الإيرادات دي، من بعد نادية الجندي ونبيلة عبيد هي ياسمين عبدالعزيز، بس نجمة مصر هي منى زكي”.

 

 

السعدني لحبر سري: “أحمد الفيشاوي أفضل مني، وأحمد فلوكس ظلم نفسه”

وعن أفضل ابن فنان بيمثل من بين “محمد إمام، كريم محمود عبدالعزيز، أحمد فلوكس”، قال: “أنا شايف من صغري أن أفضل ابن فنان بيمثل هو أحمد الفيشاوي وده بالنسبة لي وأحسن مني أنا شخصيًا، أنا إزاي أحكم على زمايلي الجمهور هو اللي يحكم، ولكن أحمد فلوكس ظالم نفسه”.

 

 

وطلبت من “أسماء” توجيه كلمة لكل من “زوجته الراحلة، وأبناءه”: “بحبهم” وطلب منها السعدني إنهاء هذا السؤال بعد أن فاضت عيونه بالدموع.

 

 

السعدني عن أزمة مسلسل بطلوع الروح: “حملات موجهة لأنه اتهاجم من الأفيش”

وبفقرة حبر سري، والكارت الأول كان عن الهجوم، والسؤال هو “مسلسل بطلوع الروح اتهاجم بشدة بحجة أن الفن يربط الإرهاب بالدين” قال: “أنا حضرت زمان العرض الخاص لفيلم الإرهابي للأستاذ عادل إمام ووزير الداخلية ووزير الإعلام وغيرهم كانوا حاضرين العرض، وكان في سينما هيلتون في المؤسسة،وكان في تهديدات بتفجير السينما وقت عرض الفيلم، ولكن لو على شويه تويتات يبقى تمام، لكن واضح أوي أنها حملات موجهة لأنه اتهاجم من الأفيش، هو حد يعرف إيه اللي في المسلسل، والهجوم من حسابات وهمية وده إرهاب فكري”.

 

 

السعدني: “أتضربت أنا وأحمد السبكي في الاستاد بمباراة الأهلي والزمالك”

وعن انتماءه الرياضي، قال: “أنا أهلاوي متعصب جدًا وجمهور الزمالك مش بيهاجمني على السوشيال ميديا، ولكن اتشتمت في الاستاد واتضربت أنا وأحمد السبكي، وده كان في ماتش الأهلي والزمالك، مرة غيبت عن إمتحان عشان أروح أحضر مباراة”.

 

 

والكارت الثاني كان عن المقلب، والسؤال هو إيه الملقب اللي عملته وكان صاحبك هيموت من الخوف، قال: “أنا مش بعمل مقلب بمعني مقالب لكن مواقف غريبة شويه، مرة كنت أنا وأحمد رزق في الساحل الشمالي، وقعدنا لوحدنا لمدة أسبوع، وجاءت أحلام زوجة رزق، وسألت كما بنعمل إيه وكده، قولت لها زوجك كان خاربها خالص ما صدق أنك مش موجودة، ممكن أهزر هزار غبي شويه”.

 

السعدني عن أزمة شيرين عبدالوهاب: “لا أدعي أني صديق مقرب منها، وعايزين شغل كتير ونستمتع أكتر بموهبتها”

والكارت الثالث عن الأزمة، والسؤال هو بما أنك صديق مقرب لشيرين عبدالوهاب شايف أزمتها إزاي، قال: “أنا لا أدعي أني صديق مقرب من شيرين، وإحنا مش قريبين أوي من بعض ولكن بنسأل عن بعض كل فترة، ومقدرش أتكلم عن أزمتها لأنها حياتها الشخصية، وهي رمز من رموز الغناء في مصر وكل اللي عايزنه منها أننا عايزين شغل كتير وعايزين نستمتع بموهبتك”.

 

 

وفي فقرة وش كسوف، والسؤال الأول هو، أخذت باقي أجرك في مسلسل كله بالحب ولا لأ، قال “السعدني”: “لأ ومقدرش أتكلم في الموضوع ده لأن في المحكمة”.

والسؤال الثاني هو عن سبب إثارة الجدل بسبب صوره مع مي عز الدين، قال: “معرفش بس ممكن يكون عشان إحنا مجتمع شرقي، وناس كتير لسه متفهمش فكرة الصداقة بين الرجل والأنثى، وإحنا أصحاب من 15 سنة، مي أختي”.

والسؤال الثالث هو ليه أحمد السعدني مش نجم شباك زي أكتر من مسلسل في جيله، قال: “معرفش، وأنا مش مقصر في حق نفسي وبستغرب الناس اللي بتدخل في صراعات عشان الأفيش.