رؤية وابداع
أقولك سر
هاني آدم
أقولك سر
أنا فى بعدك بحس الدنيا فايتانى
و أحس آهاتى فاكرانى
و أتفه حاجه تكسرنى
و ريحة الآه بتوجعنى
ساعات فى حاجات تفوق الحب بمراحل
يا موجود مهما كان راحل
و مالى عليا كل الدنيا بوجودك
وعودك حتى لو دايبه بترقينى
و صوتك حتى لو بزعيق
يونسنى
و نومتك حتى لو مش دارى من تعبك
يا ناسى الكل بحبايبك
و شايل الحمل للآخر
فاكر لما المرض بعدك و سابنى وحيده فى السكه
ماكنتش عارفه و لا قادره الحياه عادى
و أبسط حاجه كنت أعملها لولادى
كانت زى الجبل صعبه
كانت زى اللى ماشى لوحده من غير روح
و ناسى البوح
تروح الذكرى و تعدى عليه مجروح
يعافر بس علشان لسه عنده يقين
بشوق مسكين
و سكينه بارده بتقطع فى أحلامه
و شايف البعد قدامه
بيعزف غنوه ما فيهاش كلمه بتفرح
يا سكرانه ماشيه تتطوح
و واعيه لكل أسباب الزعل و القهر
أقولك سر
أنا فى بعدك محلك سر
إقرأ أيضاً:
وحيدة أنا
صنيعة القدر
وقف الرسول
إتبعنا
