أنا خونتك
هاني آدم
أنا خونتك كتير جدا
حاولت احسبها مش عارف
حوالى ١٠٠ مره فى الإسبوع
و عشرين مره فى الساعه
تلات مرات فى وسط الأكل
و مره في نزلة التحرير
و مره فى غربتى و البعد
عن أرضك و موانيكى
يا عنقود العنب من فرط أوجاعك
بتبكى عليكى مساكينك
و مساجينك
و زنازينهم
هيطلع إمتى من بينهم
مارد يقدر على الأوجاع
يسلم نفسه و الأحلام
لبنت تعبها كتر الشوق
أنا اللى ما صونتش التواريخ
و أنا اللى فى هجرك المجقوق
و أنا اللى كفرت من كتر اللى خدعوكى
و خدوا منك و ظلموكى
و لا إنتى بتزهقى من الجرح
و لا ضميرهم بيصحى فى يوم
ماهو انتى حقيقى تستاهلى إن أنا أخونك
و أكفر كل عشاقك
عشان مش كل إثمك ظن
عشان قلبى اللى ياما بيحن
عشان سايبه اللى ضحوا بنفسهم محابيس
و قابله عريس بحلم فشوش
حالف ليبيعلنا الفنكوش
و يمسك فيكى بإيديه حبه و سنانه
و بعساكره اللى غرقوا فى دم
مراهن ع المرض و الجهل
و الخوف حتى وسط الحلم
لما الوطن يطرح حبيبه
و الحبيبه تكون وطن
كل عشاقك يا بهيه غرضهم جسمك
إلا أنا و كام معتقل
عاشقين عنيكى
