لم الدفاتر
قلم/ هاني آدم
لم الدفاتر و الخواطر و المجاز و الذكريات
و خبى نفسه فى عز يأسه
منتهى العشق الثبات
كان بيحلف بالليالي و يعزف الأغنيه حرف
عاش غريب بين نحو و صرف
و فى عنيها مات
مش موت بالمعنى اللى فهمتوه
إنه نهايه
ده وحى آيه
إتمكنت من قلب مؤمن
بإختصار كان حد مدمن
و الإدمان مش كله آهات
لملم بقايا الروح فى بيت
شعر المجاز ما فهمش قصده
و زاد فى عنده
عشان تكونله
الحلم و البيت و السكن
مجنون فطن
بالمستحيل علشان تميل
ريحة الفراق
و لا عمره داق طعم الخيانه
فى أى خانه من الخانات
كمل صلاته بدعوتين
دايبين حنين
و سكر حلال
فى مجال حكاية حبها
داق غلبها
و عند السنين
جنين حضن دراعات أبوه
فى عز الأنين
و الشوق ما سابش لحد حاجه
النار محتاجه
حضن يطفيها
عشقتنى عنيها من غير داعى
قالوا فى دفاعي
مجنون مختل
فاكر الشمس هتشتاق للضل
و المعجزه ممكن تتحقق
على إيد دجال
الشاعر قال
و قوالته كانت سر إدانته
مات فى مدينته
و عاش ع الورق
لم الدفاتر و المجاز
و حاجات كتير ساكنه الضمير
و إترجى رحمة ربنا
ترطب على اللى ما كانش همه
غير شعورها بالأمان
و بطلها مات
إقرأ أيضاً:
حلم عزيز
ثرثرة فوق جبين الذكريات
سجين