مقالاترؤية وابداع
أقنعة
أمل منشاوي
يا اللي انت مرسوم فوق جبينك
ألف طاقة من الأمل
إيه العمل ؟!
لو أجبروك توصل لحلمك بالخداع
إخلع قناع والبس قناع
والعب على كل الحبال
ما تقولش يوم كان عندي مبدأ
أصل المبادئ زي طير
فارد جناحه على الجبال
تقدر ف يوم توصل إليه ؟؟
وانت مغروس جوا قهرك
ممنوع عليك صوت صرختك
ممنوع عليك يتشد ضهرك
البس قناع وتعالى شوف جوا الجراب
هتلاقي كذب.. وكمان خيانة..
لابسين قناع
مكتوب عليه أهل الفضيلة
وهنعمل ايه !
هو يعني كان في يوم باليد حيلة!
قرب تعالي ما تتاخدش
شوف لسه جوا جراب زمانك إيه كمان
دا خوف ولابس توب شجاعة
واقف كما صقر في ميدان
بس الميدان مليان فراخ
وديوك آخرها ويا كل شروق تصيح قبل الأذان
البس قناع
وتعالى لجل نعيش حياتنا
زي القطيع …
من غير لسان
إقرأ أيضاً:
سجين
صراخ صامت
سماء ملبدة بالغيوم
إتبعنا
