شيل يا جدع شيلتك

سلوي صبح

إن ضاع في يوم أملك

وخاب في بعض الناس ظنك

شيل يا جدع خيبتك

وامشي على مهلك

هدِّي الخطاوي أوي

بس اوعى تتلكع

تتسرع

هتتوجع

صحيح الوجع ظالم

وعذابه مش راحم

خاين

وقادر يكسر ضهرك..

إنت سليم النية

وسكتك مش ديَّة

سكة سلامتك

لها أبواب ع الجنة موديَّة

والعبرة بالضحكة

تبقى في الآخرة من بختَك..

ده كل شيء فيه عيب

حتى الشعر بيشيب

وإن كان اليوم في حبيب

لو مش حبيب بجد

بكرة عنك راح يغيب

حافظ على قلبك..

تقلت أنا شوية

أنا مش بحاول أُهديك

ولا في النومة أخليك

مقصدشي صدقني

بقول الكلام ده لنفسي

علشان أنا زيك..

حاولت متحاول

تعبت عادي جدًا

بس المهم

تبقى واقف على رجليك

ده لو قدرت

زي الأسد هلكان

بس مهوش تِعبان

في الجحر متمدد

وربك الشاهد على طيبتك

حرمت يا معافر

بقلبك الفاخِر

تبقى سليم النية

م الآخر..

شيل يا جدع شيلتك

اقرأ أيضاً:

قهوتي ثائرة

نهاية الحلم

حياةُ النفوس