أعمل إيه
عادل زوين
طب نكتب إيه
قوليلي عنك نكتب إيه؟
أوصاف كتير بتتكتب
بس أنت وصفك مش لاقيه
صوتك تملي مش ناسيه
في الحسن وردة مفتحة
شافها القمر ليها انتحى
ملكات جمال متنحة
وحضور خيالك جاااائحة
بتبكي قلب وتسعديه
حبيبتي فوق صنف النسا
ماارلين أمامها خنفسة
و بونبانية ملبسة
يا قلبي يا ناره اللي فيه
الحرف منها أغنيات
بصوت وحنية نجاة
ملكتني فعلا لما جات
وأموت وهي مروَّحة
طب يبقي اييييه؟
تحضر دموع والعقل غاب
والقلب فيها أيوة داب
تعليقتي سودة كالهباب
طب أعمل إيه؟
أسير و قلبه مكتفه
يحرق في ريشه وينتفه
وكل أصناف البشر دول يتنفوا
وفي وسط داومة هروب
من أسر روحي للغروب
بحرف سعيي تنسفيه
لكنّ عيبي فيّ أنا
ما هو أصل عاشقك كام سنة
و معاك ألوان الهنا
لو وسط نار هرجع إليه
أصل أنت ِ مش ست وخلاص
معاكِ شفت كتير خلاص
من كسرة ولقسوة ورصاص
ازاي ما قلبي تملكيه؟
يجوز كلامي يبقى ساذج أو تقيل
لو قلب قلبك مطرحي
يقدر يشيل؟!
ما يشيلش منك أو يشيل
إحساس وحيد ماللي مداريه
مش قادر أكتم أنّتي
لو حتى ردك حسرتي
لو زيي كنتِ هتكبتي ؟
حنينه للي دوم حاييه
قوليلي طيب أعمل إيه؟!
ساعات كتير بحس ضعفي وأكرهه
وأدادي قلبي وأنصحه
وأقول ده دمي هسفحه
ألاقيك فيه
وساعات بحس بخنقتك
وأحس إني مموتك
ولابد أخلي سكتك
و ألِف وشي وأنتِ أول وش أشوفه وألتقيه
طولت عارف بس عندي كلام كتير
وبحس قلبك ده فيه حنية حرير
هل ممكن أسأل فتنتي
يا ست قلبي ودنيتي
وأنا راضي كل اللي تقوليه
يا ريت تقولي أعمل إيه
