رؤية وابداع
مع كُل طَلة شمس
نبيل المصري
مع كُل طَلة شمس
بيفَتَّح عِينيه
ويقول يا باسط
ارزق العبد الفقير
ويشُق ريقُه
بكسرِة اللقمة الحلال
مع بُق قهوة و ينطِلق
سايب على ربُه التُكال
ومافيش سؤال ينقح عليه
أيام طُوال بتعدي بيه
ولا عمرُه مال
ولا يوم شكىٰ
بيحاكي صبرُه ولو حكىٰ
من غير صدىٰ زي الأثير
رغم الحياة المِستأسِدة
مايقولش ليه حظي كِده
حتى البيبان المُوصدة
ماخدِتش من فِكرُه الكِتير
كان كل مابِيخبط في سور
يبني الجُسور الطيبة
و يعدي بالقلب الجَسور
ويقول يارب إنت الكبير
يا واهب الصُبح المُنير
فرصِة حياة متجددة
يا مانِح الستر الغزير
راجي طريقًا مُرشدة
يا مُصلح الحال بالمُحال
يا نور لكل الأفئِدة
اسمحلي يارب بسؤال
ليه البشر مِتعنّدة
ليه بعضهم بعض في عِدىٰ
مع إن مهما العُمر طال
ليك المآل و رِضاك منال
يا خالق الرُوح و الجمال
اجعلني ليك عايش رِضا
إقرأ أيضاً:
سجين
مطبات الوجع
إلى مجهول
إتبعنا
