مرثية ود

أمل المنشاوي

مراجعة لغوية: رويدا أحمد.

يوم م الأيام

كان ليك إنسان مخلص وودود

بالخير بيجود

خلاك غرقان في بحور من ورد

وشوق وحنان

خلاك إنسان

حاسس بكيانك من تاني

حاسس إنك فعلا موجود

وكأنك تاج متزين بيه شعر أميرة

وفي لحظة عند وأنانية

يقفل قدامك كل بيبان فتحت بينكم

ويسيب جواك ذكرى مريرة

وسؤال محتار مش لاقي جواب

وعيون جامدة

بتحاول تضحك وتخبي

لكن للحق .. مليانة بحزن ومكسورة

أوقات بتحن..

وساعات تلعن اسم وصورة

وكتير بتقول … فيها إيه يعني

دي قلوب الناس

في إيدين الله وبتتقلب

لا صديق دايم ..

ولا دايم أبدا ليك أعداء

هتعيش غلبان وتموت إنسان ..

وهترجع تاني تقابل ناس

تاخد منك راحة بالك

وتسيب وياك هم وأحزان

يا دي الحيرة

إقرأ أيضاً:

عفوًا لقد نفد الرصيد

 إلى أمي حبيبتى

الشارع