كومبارس
محمود عمر
بدأت حياتي ومكمل
بركب وش واتجمل
وكل ما اقول يا قلب اقسى
يعبي حنينه ويحَمِّل
وقفت وقلت هتأمل
غلطت ولازم اتحمل
قفلت الباب عشان انسى
لقيت القلب بينمل
فتحت بسرعه وانا خايف
جريت في الدنيا مش شايف
شافوني الناس قالوا لي اصحى
هتبقى لإمتى مش عارف
حياتك، حلم مـ الأول
وفاصل، بس هيطول
وقلبك مهما عاش فرحان
هييجي اليوم ويتحول
_صحابك!
لأ مالكش صحاب
_نهايتك!
ما النهايه تراب
هتديك الحياه وتاخد
وفي الآخر هتبقى سراب
يا كومبارس فـ حياه كارتون
وخد جايزة بطولة فيلم
حياتك نسخه بالكاربون
من اللي لقيتها جوا الحلم
مالكش عزيز تعيط له
وعينك شاهده عـ الأحداث
وقلبك كل يوم قاتله
بتفكيرك في بعض الناس
مالكش نصيب تعيش تاني
خلاص هتسيبنا وِتوَلِّي
يا عايش عُمْر بتعاني
مِكَمل تاني ليه قول لي!
هتكبر إمتى وتفرَّق
ما بين الفقد والخذلان!
سفينة الحُب بتغرق
وتملى القلب بالأحزان
بعينك بُص عـ الدُّنيا
وحكم عقلك الملهوف
ما تحلمش بحاجات تانيه
وترجع تاني يوم مكسوف
هنتقابل وبكره تشوف
حياتك رايحه للهاويه
تقرب لك تموت مـ الخوف
وتجري بسرعه عـ الزاويه
تاخد لك ركن وتخيط
بإيدك حزنك البالي
تبص على السما تعيط
وتكره وضعك الحالي
تسيب نفسك لأحزانها
تغيب روحك فتلعنها
يا تاعب قلبك المرتاح
بنار الناس ودخانها
مافيش عاصِم من الأحزان
ما دام القلب في جيوبها
هتغرق ألف مره كمان
إذا قربت من توبها
يا ريت ترتاح ولو مره
عشان قلبك خلاص غادر
ما تطلعش الحياه برا
ما دام من جوا مش قادر
