كراسات اللقا
هاني آدم
اجمع دفاتر وحدتك مع كراسات اللقا
و اطرح جراحك بقى
من جملة الافراح
شوف كام حبيب بعتهم
و كام حبيب باعك
و كام صديق غرقك
و كام صديق خانك
و كام صديق كملوا معاك لدلوقتى
قبل أما تندهلهم
بيحضروا وقتى
أول ما تحتاجلهم
من غير ما تندهلهم
متلومش غير نفسك
دى كلها اختبارات
خدتها بنفسك
فرص و ضيعتها
و كلمة ما قولتها
و طريق قطع نفسك
و تمن شهور و سنين
ضيعتها فى قرب ناس
حرام تقربلهم
و بعدت عن تانيين
كانوا مشتاقين طلتك
كرهت ليه قربههم
تنهيدة مكتومة
و خطيئة معصومة
و حلم نصه حرام
كلام مالوش معنى
جاب م القريب طعنة
طرحت جراح و آلام
الحسبة فيها أخطاء
شاء فيها من لم يشاء
عمره يضيع ببلاش
و ساعات فى غفلة وجع
ترجع مواسم الجدع
يحس بالانتعاش
تهرب آهات دواوينه
فى ضحكة من بنت روحه
و واد شايل تفاصيله
معرفش يسندلهم
على الزمن ضهرهم
و يغنوا على مواويله
لام نفسه تانى الجدع
على كل لحظة هوان
آن الأوان تبقى باقى
أناشيده سطر فى أدان
يمكن فى الوقت الضايع
أحلامه تلحق جون
الشاعر من يومه ضايع
معجونه حكاياته جنون
