مهما تفرقنا الظروف
مصطفى ممدوح
مهما تفرقنا الظروف
مهما قست الحياة و حوت حولينا الخوف
لسة في ناس فيها إحساس بندور عليه
بنشوف و نقابل كتير وما بين الشر والخير بنطوف
و هي الحياة إيه غير سكة ما بين دمعة و ضحكة
قطر العمر بيمر بمحطة الحلو والمر وكله من عمري
فعيش حياتك و خلد ذكرياتك كلها لحظات
الحلو فيها حي والمر فيها مات
ولا تغرق في دموع و آهات
و كاتم حزنك في قبر السكات
خلي في أمل
و العمل على حل الألم مش مستحيل
ابسط نفسك بنفسك بأقل شيء بس إياك تميل
لسكة الهموم لو وقعت قوم و هات الفجر بعد الليل
بابتسامة ارسم نفسك علامة في عيون أحبابك
اللي فاتك فوته ولا تعود له لو خبط على بابك
اللي سابك لو حبك ما كانش طاق غيابك
احنا فرصة مش بورصة يتلعب بينا
مرة واحدة و مش بتكرر ف قرر يا معايا تكمل
يا من الاول قول مش هتحمل
أنا مش ملف من داتا ع موقع تملكه بتكة
أنا إنسان متقلب الأهواء و المزاج لو ناوي رفيق سكة
كلنا بأخطاء منها اللي يتطاق و منها أبدًا على الاطلاق
أصدقاء يبقى أخوة ورفاق
لحم ودم وعقل واسع النطاق
مفيش الشكر والأسف الصداقة مفيهاش طلاق
لا كدب ولا نفاق وطلاق
نهر جاري من العطاء
لا بخل ولا حسد ولا غل الجيب واحد في الإنفاق
النهاردة عندي بكرة عندك امبارح مش فاكرين
قصدت صحبة بمحبة أخوة تدوم لبعد حساب الملكين
كل ما نسامح لبعض كل ما انعدم البعد
و دة الوعد نعيش الحزن و السعد
كدة أقدر أقولك يا صديقي
مهما أمشي رجلك على رجلي يا رفيقي.
