“دخان من غير نار”.. أمير كرارة ينفي خلافه مع أحمد عز بسبب فيلم الخلية

تقرير/ هاجر زينهم

حل اليوم الفنان “أمير كرارة” ضيف لبرنامج “حبر سري” والذي تقدمه الإعلامية “أسماء إبراهيم”، والذي عرض على شاشة قناة القاهرة والناس في تمام الساعة 6:20 مساءً.

وفي السطور التالية يرصد لكم موقع “رؤية وطن” عن أهم تصريحات أمير كرارة في حبر سري:

 

أمير كرارة لحبر سري عن خلافه مع أحمد عز بسبب فيلم الخلية: “دخان من غير نار، أحمد عز أخويا الكبير ونجم كبير”

عن إشاعة أن كرارة اختلف مع أحمد عز في الجيم، بسبب تشابه فيلم الخلية مع مسلسل كلبش، قال: “أنا مش عارف الإشاعة بتطلع من مين، وتنتشر بالشكل ده إزاي، أحمد عز أخويا الكبير ونجم كبير”.

 

وتابع “كرارة”: “جت لي تفاصيل خناقة وإن إحنا مسكنا في بعض ، ولكن والله ما في الكلام ده خالص، ولا حتى مشدة كلامية وده فعلاً دخان من غير نار، عز فنان مؤدب وجميل جدًا”.

أمير كرارة عن فيلم الممر: “أحمد عز عمله أحسن مني، زعلت لما أني مش عملت الدور”

وعن سبب إعتذاره عن مشاركته في فيلم الممر، قال “كرارة”: “أنا أعتذرت عن دور في فيلم الممر، عشان كنت مشارك في كلبش 3 وحرب كرموز، وكنت أتمنى أني أشتغل مع أستاذي الكبير شريف عرفة، وأحمد عز عمله أحسن مني، زعلت لما شوفته أني مش عملت الدور وفرحت لما بنجاح الفيلم لأنه مشرف”.

وتابع “كرارة” قائلاً: “لم أعتذر عن عمل وندمت عليه، وعن كثرة أدوار الضابط الذي قام بها، قال: ” مش كتير أنا قدمت 5 أعمال فقط، وكان هناك إختلاف، كلبش كان ضابط شرطة، وحرب كرموز كان ضابط شرطة في زمن مختلف، والإختيار كان ضابط قوات مسلحة”.
أمير لحبر سري: “الطبال توقيته مكنش صح كان ممكن أعمله قدام شويه”.

وحين سُئل عن تقديمه دور ثم ندم عليه، قال “كرارة”: “مندمتش ولكن مكنش في وقته، طرف تالت وحواري بوخارست، حسيت أن كله كان شبه بعضه لما جيت بعدهم عملت دور الطبال مسلسل كويس كان أحمد خالد أمين مخرج شاطر جدًا كان أول حاجه له بس عمل شغل كويس جدًا هو مخرج جميل وزي أخويا الصغير”.

“ولكن حسيت أن إختيار الدور في الوقت ده مكنش صح كان ممكن أعمله قدام شويه مش كله ورا بعض شبه بعضه بنفس الشكل ونفس التركيبة”.

أمير عن الإعلانات: “كل الإعلانات اللي قدمتها كلها برندات إنترناشونال، وأنا بخاف على مستوى الإعلانات زي شغلي بالظبط في التمثيل”

وعن رأيه إذا كانت الإعلانات للفنان مجرد سبوبة أم تضيف لتاريخه، قال “كرارة”: ” لا طبعًا بتضيف له حاجه لتاريخه أنا صريح جدًا ومعنديش حاجة أخبيها، سبوبة لما أعمل إعلان وحش عن منتج وحش وميصحش إني أعلن عنه للناس”.

“الحمدلله لو رجعنا لكل الإعلانات اللي أنا قدمتها كلها برندات إنترناشونال، وبختار الإعلانات اللي بقدمها، أنا بخاف على مستوى الإعلانات زي شغلي بالظبط في التمثيل، مفيش إعلان عملته وندمت عليه”.

 

أمير كرارة عن مسلسل الإختيار: “الإختيار براند مينفعش متتفرجش عليه، وعمل ووطني مهم”

وسألته “أسماء” إذا كان شاهد مسلسل الإختيار 2، وعن رأيه كمشاهد أي جزء نجح أكثر، قال: “طبعًا اتفرجت عليه، لثلاث أسباب رقم واحد إن الإختيار براند مينفعش متتفرجش عليه، الإختيار عمل كبير ووطني مهم، أنت مش متخيل رمضان من غير الإختيار، تاني حاجة عشان أتفرج على بيتر ميمي ثالث حاجة أنا بحب كريم عبدالعزيز كمشاهد وكأمير، كنت عايز أشوف كريم في الإختيار عامل إزاي، طلع عمل كبير جدًا”.

وتابع كرارة قائلاً: ” لم أخشى المقارنة لأن الجزء الأول كان بيحكي عن قواتنا المسلحة، أما الجزء الثاني بيتكلم عن الداخلية ، والحمدلله الجزء الأول والثاني كسر الدنيا في الوطن العربي، والجزء الثالث السنة دي أنا بتمنى لهم التوفيق، وإن شاء الله يكسر الدنيا”.

 

كرارة لحبر سري: “ظهورنا كضيوف شرف في العمل بيكون واجب منا بنعمله مع أصحابنا، ولكن لازم يستحق أني أعمله”.

أكد “كرارة” أن ضيف الشرف في الأعمال الفنية بيكون مجاملة لنجوم العمل، حيث قال: “ظهور الفنان كضيف شرف في العمل بيكون واجب منا بنعمله مع أصحابنا، دي أول حاجه بفكر فيها أني أروح لمين مين من صحابي، أقف جنب مين من صحابي، ولكن في حاجتين أنا لازم أكون رايح أعمل ضيف شرف في حاجة تستحق أني أعملها”.

 

كرارة عن مشاركته في سبع البرمبة: “رامز أفلامه كوميدية لطيفة، ويستحق أننا نجامله”

وعن ظهوره كضيف شرف في فيلم “سبع البرمبة” مع رامز جلال، قال: “رامز جلال نجم كبير والناس بتحبه جدًا، وأفلامه بتكون كوميدية لطيفة، ومحترمة ولذيذة، وكان أحمد السقا وياسر جلال ضيوف شرف أيضًا، وأتبسطت جدًا وكانت تجربة لطيفة جدًا، ولم أتضايق منها نهائيًا، والفيلم محترم وحلو ، ورامز يستحق أننا نجامله”.

 

أمير عن برامج رامز جلال: “برنامج رامز أفكاره دائماً مجنونة ومطرقعة”

وحين سألته “أسماء” عن رأيه في مشاركة رامز جلال في برنامجه وليس كضيف، قال: ” نفسي وأنا بحب برنامج رامز وأفكاره دائماً مجنونة ومطرقعة، وأنا تخيلت مرة أنه يستضيف حد منا نعمل مقلب في الضيوف”.

 

كرارة عن إشاعة خلافه مع السقا: “أحمد معروف أنه جدع وأخ لأي حد”

وعن إشاعة خلافه مع أحمد السقا التي وصلت إلى المقاطعة، قال: “أنتي جاية على واحد جوه وبره الفن عارفين علاقتي به إزاي ده أخويا، في يوم من الأيام كنت مسافر في الساحل الشمالي، أحمد كلمني قالي بقولك إيه في فيلم كده اسمه هروب إضطراب إحنا هنعمله سوا، قلت له طيب يا أحمد مقولتش إيه الفيلم ولا هقرأ ولا مين المنتج، ولا هأخذ كام، وقلت له اتفق أنت، أحمد معروف أنه جدع وأخ لأي حد”.

 

كرارة عن دوره في نسل الأغراب: “تجربة غريبة جدًا، وتحدي كبير ليا”

وعن مسلسل نسل الأغراب وهل أضاف له ولا ضرك، قال: “نسل الأغراب تجربة غريبة جدًا، أنا شايف أنه اتهاجم زيادة عن اللزوم، في ناس حبت المسلسل وناس لا، وهو أضاف لي حاجة كان لازم أطلع من دور الضابط اللي كنت بعمله كل سنة فحبيت إني أعمل حاجة مختلفة، والدور كان تحدي كبير بالنسبة لي، وخاصة أنه باللهجة الصعيدي هي لهجة جميلة وكلنا بنحبها بس كانت صعبة جدًا، والمجهود اللي كنت بعمله في نسل الأغراب كان 10 أضعاف مجهود أي مسلسل تاني، والخلاف في الرأي ده معناه أن الكل شاف المسلسل”.

أمير عن مسلسل روبي لحبر سري : “رأيي ليس له علاقة بسيرين عبدالنور، وهي حبيبة قلبي”

وعن خلافه مع الفنانة سيرين عبدالنور بعد مسلسل روبي، يعد تصريحه بأن العمل لم يعجبه، قال: “رأيي ليس له علاقة بسيرين عبدالنور، لأنها ممكن تكون أقرب واحدة في الوسط الفني قريبة مني بالوطن العربي كله، أنا وسيرين صحاب جدًا وفريد زوجها، وأنا حضرت مولد ابنتها”.

“لكن مشكلتي أن المسلسل كان البلد كانت في ثورة، وأنا كنت سايب زوجتي وابني لسه مولود، والظروف كانت صعبة، وكنت بقعد في بيروت أكتر ما بقعد هنا، كنت بقعد 4 شهور في بيروت وأنزل يوم واحد أشوفهم، وده اللي كان قافلني من المسلسل، لكنه كان تجربة حلوة، وسيرين دي حبيبة قلبي”.

 

أمير كرارة عن قلة ظهور أحمد حلمي: “مش أنا اللي هقيمه، وهو بيختار أعماله بدقة شديدة”

وحين سُئل “كرارة” عن قلة ظهور أحمد حلمي في الأعمال الفنية بفقرة تضحك تخسر قال: “دي حسابات لأحمد حلمي، بس انا شاف أنه من الناس له شكل لوحده مش شبه حد خالص، وطبعا أحمد حلمي نجم كبير مش أنا اللي هقيمه، وهو لما بيعمل عمل بيختار فيلم غير التاني مش ماشي على مدرسة واحدة ويلا نعمل أي حاجه عشان نضحك الناس لا، أحمد بيختار أعماله بدقة شديدة، هو بيحب يعمل حاجة محترمة تكسر الدنيا في كل مرة وربنا يكرمه”.

أمير كرارة لحبر سري: “أنا مش بتاع سبوبة، وبحب أنتقي أعمالي عشان أولادي”

وعن إختيار أعماله قال “كرارة”: “أنا مش بتاع سبوبة أنا يا أعمل حاجة محترمة أو ما أعملش، بحب أنتقي أدواري عشان يفضل عايش اسمي، أنا بخاف على اسمي أنا بقولها دائمًا عشان أولادي.

 

أمير كرارة: “باشا مصر تاني اسم بحبه، وهو حاجة مشرفة وجميلة”

وعن تلقيبه باسم باشا مصر قال “كرارة”: ” ده تاني اسم انا بحبه واول اسم هو أبو سليم، لأن أبو سليم اسم لكن باشا مصر لقب، وأنا أتبسطت بلقب باشا مصر لأنه اسم كبير، واللي طلعه حبيبي محمد دياب وإحنا بنصور مشهد في كلبش وأنا معدي فجأة لاقيته بيقول باشا مصر وبيتر قالوا خد تعالى حلوة دي قولها، والحمدلله حاجة مشرفة وجميلة”.

 

أمير عن جملة كُتع كُسح كُسل: “قلبت الدنيا ومن الحاجات الإيجابية في نسل الأغراب”

قال كرارة: “جملة كُتع كُسح كُسل قلبت الدنيا وأتعمل عليها أغاني ودي كانت من الحاجات الإيجابية في نسل الأغراب، عملت شغل جامد جدًا الجملة دي بس أنا مش بتاع تديندات، وأنا معرفش يعني إيه تريند”.

 

كرارة عن شبيهه عبدالله: “فينا شنب من بعض على رأي سليمان عيد”

وعن تريند شبيه أمير كرارة قال: “شوفته كان اسمه عبدالله كرارة، فينا شنب من بعض على رأي سليمان عيد” ووجه كلمة لشبيهه قائلاً: “مش هتستفيد حاجه خالص بالشبه ولا حتى شبيه رشدي أباظة، مفيش حاجة اسمها عشان أنا شبه فنان هكون مثله لا كن نفسك، في فرق كبير بين عايز أبقى مشهور أو أكون ممثل.

 

كرارة للسقا: “أحمد السقا من الناس اللي بتستمتعي بالعمل معهم، وعملي معه حاجة تضيف ليا”

قال “كرارة”: “أحمد السقا من الناس اللي بتستمتعي بالعمل معهم رجل خبرة وأقدم مني طبعًا، وعملي مع السقا حاجة تضيف لي ودي حاجة من الإيجابيات لي مسلسل نسل الأغراب، وأي حد يتمنى يشتغل مع أحمد السقا.

 

كرارة لحبر سري: “لن أقبل أي شخص يسخر من مسلسل الإختيار، وبعتبر دوري كرم كبير من ربنا”

وعن الأفيه “ماسموش كرش اسمه عز، وهات حتة البشاميل دي ماتخصكش” على صورة المنسي، قال “كرارة”: “لن أقبل أي شخص يسخر من مسلسل الإختيار لأنه كان يجسد شخصية بطل الشهيد أحمد المنسي، أنا بعتبر شخصية أحمد المنسي كرم كبير من ربنا أنا مكنتش أحلم به أنا مبسوط جدًا، وبعد ما عملت الدور ده بقيت نظرة الناس ليا نظرة حب واحترام وتقدير، والناس بقيت تربطني بالمنسي ومكنتش متخيل أني قدمت حلو للدرجة دي، والمسلسل نقطة تحول في حياتي كبيرة جدًا”.

وعن مشهد الإغتيال في الإختيار قال: “تأثرت نفسيًا لأن كل الناس اللي كانت معانا كان لها علاقة بالمنسي اللي يرحمه، أصحابه وزوجته وأولاده، وأتبسطت من أول جلسة مع زوجي الشهيد المنسي صاحبه إسلام العزب ومحمد وديعي قالوا أن زوجته قالت إني شبه المنسي بالضبط، وأنا عمري ما شوفته في حياتي”.

 

كرارة عن طارق نور: “صاحب فضل عليا بعد ربنا، وهو أول حد أكتشفني”

قال “كرارة”: “أستاذ طارق نور انا بحبه جدًا صاحب فضل كبير جدًا عليا بعد ربنا طبعًا، أنا بسميه المدرسة، هو اللي أكتشفني وكنت بعمل VO لإعلان سيارة كان في شركة طارق نور فقلدته وضحك طارق حين سمعني، وبعدها طلب أنه يشوفني، وقالي عايزك تعمل برنامج ووقتها قولت له معرفش أقدم برنامج، وهو عمل نقلة كبيرة جدًا في شكل البرامج، كان معانا مخرج البرامج الكبير حبيبي ميلاد أبي رعد وعملنا برنامج Star Maker سمعنا صوتك، وأستاذ ميلاد هو اللي علمني إزاي أقعد على كرسي وإزاي أتكلم مع الشخص اللي قدامي “.

وفي النهاية قال “كرارة”: “بحب قعدة البيت جدًا وحياتي عبارة عن 3 حاجات شغلي، وبيتي وزوجتي وأولادي، وتمريني.