رؤية وابداع
عيون بتتكلم
بقلم: سلوى صبح
عيون بتتكلم ..
تحكي لك وبتسلِم..
وفِي كلامها حوار..
وعيون بتوصف شوقها
لما تتألم..
وتبلغ الأخبار..
وعيون تنادي عليك
تبعت لك المراسيل
كلامها زي الأشعار..
وعيون كلامها مَلاَم
تحدف لك السلام
وسلامها أجمل الأزهار..
وعيون بتضحك لك
ترسم لك الدنيا
كلها أسرار..
وعيون حزينة بتتألم
تصمت ومين يفهم
وبصمتها تحتار..
وعيون قاسية وقوية
نظراتها حادة وصلبة
كما الأحجار..
وعيون ماليها الحنان
والدفا والإطمئنان
ما تعرف الأعذار..
وعيون جريئة نظراتها
حريقة بتترسم عَل الخلق
يا ويلنا م الإعصار..
وعيون حبيبة شقيِّة
بتطلب الملاغيَّة
وفِي عشقها استعمار..
وعيون سهارى حيارى
نهارها ليل وليلها نهار
وتناجي في الأسحار ..
وعيون عارفة هدفها
عليك تنشِّن ..
وتُنصُب شِباكها
صيَّادة و بتختار..
وعيون قاموسها طلاسم
ومعانيها ما تتفسَر
غامضة وغموضها
فيه العقول تحتار
#بالعاميةبقول
إتبعنا
