النخلة وقعت و الجريد فى حضنها
بقلم :محمد محمد بكر
سمع صراخ وصوت عويل
اتنين من اخواته البنات
قالوله أمك تحتضر
هات الطبيب
جري بيهتف في الشوارع
والمباني والحارات
الغاليه موتها بينتصر
شافه الطبيب
قالوه خلاص ادعيلها
هي ساعات تقابل ربنا
المؤمنه
ياحزننا المكتوب
علي جدار قلبنا
شاورت بطرف عينيها عاوزاه جنبها
هو ابنها
وحيد علي كبشة بنات
طول عمره شاف منها الدلع
شاف البدع
شاف الحنان والطيبه
وكتير م الحاجات
مد في إيديه تحت راسها يرفعه
علي صدره حطه وشاف بانه موضعه
ترتاح عليه
نزلت دموعه م العيون
علي خدها
قالت حبيبي يابن بطني
الحزن ليه
حان الرحيل خليك جدع
طول عمري شايفه إنك انت
واد جدع
هاديك أمانه تصونها وانت
من يومك امين
شيل البنات في النني
من غدر السنين
حافظ عليهم
تبت أوي
الدنيا يابني ساعات
بتدبح في القوي
هما صغار وكمان بنات
جمع في صوته وكح كحة حشرجه
ماتبس يامه
كل الحكايه يادوب شويه من الدلع
بنشوف غلاوتك
طب عارفه يامه
الليله دي بالذات
ربنا زود حلاوتك
بدر البدور والضي جوه عنيكي يسحر
قالت ياواد بطل بكش
الليل خلاص نزل ستايره
وجسمي جاهز للقا
بالك ياواد
أبوك ده زارني في المنام
يجي من يومين
قالي ياغاليه يا نن عيني كنتي فين
غيبتي اوي
والوحده جوه الجنه من غيرك
ممات
ساد السكات
والصمت اصبح مكرمه
فجأه نطق قام قالها
يا مَّايه لسه النخله واقفه في صحن دارنا
ترمينا من شهد البلح نبعت لجارنا
مش قلتي يا امه النخله دي
اختك تمام
وتوأمك
مش قولتي ابوكي زرعها
ليكي في مولدك
النخله واقفه
بركتي ليه
طب بعد منك عندي مين
أسند عليه
طب حضن مين لما انكسر
الجأ اليه
قالت يا كبدي ياللي حضني اشتاق اليك
العمر شجره وقلبي بيضلل عليك
اه يا جنينتي وفرحتي
وفرحه سنيني
يا ابن عمري وابن أغلي الناس عليا
بسمه شفايفي ونبض قلبي
ونور عنيا
حضنها اوي
كان كل امله انه منها يرتوي
طالت في حضنه
طول اوي
طلع النهار وهما لسه في حضن بعض
ساعة العزا
الناس كمان كانت بتضرب الف كف في قلب بعض
قالوا صحيح ان انت ليك حكمه يارب
جايين نعزي في الوليه
مات ابنها
النخله وقعت والجريد في حضنها
