تفاصيل الوحدة
بقلم : منار عبد الهادي
جدران الأوضة
اللمبة الصفرا
وضلوعي يكسوها العفرة
من ضعف الذاكرة للأحضان
تفاصيل القصة من الأحزان
تكسوها شخبطة بالإسود
تفاصيل اللوحة
مش الألوان
تفاصيل اللوحة إحساس
إحساس الفرح من الأخضر
القوة من الأحمر
القسوة من اللون الفاجر
والعزلة من الغادر
والخوف؟
الخوف شفاف
تفاصيل الخوف
عربية تعطل في طريق مقطوع
إحساسي بحاجة لأنفاسك والشوق ممنوع
لهفة مكبوتة فقلب الحداد للغرام
بوسة مسروقة خلف أسوار الحرام
أنا كنت بشوف الموت مبخافش
دلوقتي بشم الخوف ….فبخاف
تفاصيل العزلة
فلسفةفردية
الاختلاط عيب
والناس ؟
الناس حالة اعتراضية عالغياب
والغيب ؟
محتاج تحلي بالإيمان
تلافي القدرة عالمناهدة أو العتاب
العزله مش عادة
العزله إعتياد
تفاصيل الموت
أو السكوت
تفاصيلك
تشبه الاكتئاب
أوفر دوز نيكوتين
ميكس متعادل مع القهوة
يوازي نقص فالشهوة
للتحمل للجدل أو للجلد
إنحناء قهري مع
عجز تام عن لانتصاب
تفاصيلك تشبه
شارع قصر النيل فيوم ضباب
قديم
بريحة الايام
خالي من الوحده عامر بالزحام
كشاكيل من الذكرى ومالدخان
تفاصيلك
تشبه قلبي
بركان
تفاصيل الغياب
معادلة كاملة المسافات
أنا زايد عليا كام وجع نساوي إنت
إنت ناقص منك كام حنين تساوو أنا
أنا زائد إنت نساوي العدم
والعدم تام
مكتمل الفراغات
#فقاعة
للمزيد من المقالات اضغط هنا
