سألوها مالك
سألوها مالك
بقلمي / داليا يحيي
سألوها مالك
سكتت كتير
عادوا السؤال وقالوا مالك
ميت ألف مالك
وعنيكي ليه الدمع فيها وصوت آهات
ردت وقالت كدا وبثبات
بكفاية مالك ، قلبي اللي هالك
مش عاوز منكوا غير السكات
لا يوم هبين جراح وويل
ولا هنطق ، إني عافرت ياما بالمستحيل
وفوق كتافي علم كتير ، صبر وألم وليل طويل
والفرح كان يادوب يعدي ، ماهو أصله كان حبة فتات
في عز ليلي الكل نايم وأنا اللي أناتي تصحي اللي مات
القلب نازف والعين بتبكي والوحدة عندي مالهاش بديل
وسط الجموع القلب متغرب وتايه
جاهز ولابس توب الرحيل
عايش مابين السطور يدور علي ذكريات
رجله تعبت م الخطاوي لساه بيجري ، والقطر
عدي من بدري وفات
ياللي رافضين تقروا عنوان الجواب
القصة خلصانة ، من سنين حدوته ومنهيه
بس مش نهايتها تبات
لسه فاضل حبة رتوش ، هيجملوها
لسه فاضل حبه دموع علي رعشة جوايا بتصرخ
من أنينها قادرة تفهمها وتحس بيها كل اللغات
ياجراحي ، ما تردي سؤالهم
ردي عليهم خليني أطوي صفحتي ، وأنسي إني
يوم كنت منهم كنت ليهم
خلي رحيلهم يكون بداية ضحكتي
أرجع وأحضن جوا روحي وحدتي
ردي وقولي إنك بخير ، عايشة أجمل الروايات
هيصدقوا ، القلب فيهم أصله مات
بقلمي / داليا يحيي
