رؤية وابداع
كلمتي هيَّ صاحبتي
بقلمي:سلوى صبح
أنا اللي ثقافتي فِطرتي
وأنا اللي شِعْرِي قصتي
وكل كلامي استرسال
قصيدة كانت أو موال
وبساطتي عنوان كلمتي
وبحِب شِعْرِي ودُنيتي
معاهم بطير على جنتي
كلامي نابِع من قلبي
ولا بداري ولا بخبِّي
بخرج بيه من وحدتي
وكل كلمه ليها مغزى
يُخرج من القلب يصفيه
يمحي همومُه ويداويه
وبصَّفي بيهم نيِّتي
أنا اللي رزقي في الكلمة
والله دي أكبر نعمة
تنطق بإنسانيتي
أنا إنسان يمكن فنان
وشِعري مصدر عزِّتي
وهبته صدقة عن صحتي
تسعِد قلوب خلق كتيرة
وترفع عنهم الحِيرة
وكلمتي هيَّ صاحبتي.
إتبعنا
