“أسـف على الازعاج”
بقلم: كــريـم بـامـبو
الحكاية من البداية
إن الحزن مكمل معايا
وإن أنا من الأساس
حبة بواقي سبوها ناس
وإن اللقا آخره فراق
وإني شوفت الحب داء
طب دا ابتلاء؟
إمتى هفهم؟
إن اللي راح
سابني ف جراح
وان اللي جاي
وان كان سعيد
عمري ما هفرح من جديد
أسف على الإزعاج
أسف على سطور شعري الحزين
وإني صحيت فيك الحنين
وإن اللي عطيته الف حضن
سابك بدون ما يردهم
وانك رجعت خالي الوفاض
كما كنت في الاول
اصلك حزين ولساك حزين
السرد شيء
و الحزن شيء
وانا كنت فاكر اني ليكي شيء
أغلبهم قالولي بلاش
شريتك بكل ما عندي
و بعتيني ببلاش
كترت جروحي
و ما كفهاش الشاش
الليل سواده رحمة
ونهارك يا ريته مجاش
الدنيا إن حكمت بنسلم
و الضربة اللي مش بتموت
بتعلم
وانا جسمي كله ندوب وربنا العليم
انا كونت ولازلت يتيم
يتيم الحب والاحباب
يتيم الاهل و الأصحاب
يتيم الحضن والضمة
يتيم العزوة واللمة
يا ريتني ما نزلتها ياما
انا فاكر شيخ وقفني زمان
كانت وقفة ما كانت في الحسبان
عامل ايه كيف اخبارك
حلو يا سيدنا
قعد يتكلم عن الدنيا
وأنها فانية
وان الآخرة هي الأصل
مش التانية
وأننا نازلين
ومحدش هيعمر
كان عمر فرعون اكمنه إله
أو عمر قارون دا معاه الجاه
كلنا نزلين
قالها الشيخ بنصيحة ولين
إياك تلهيك دي حرامية
وسراقة وقت
واحنا ايه يا ابني غير حبة وقت
ارجع للأصل
و اعمل لما بعد الموت
دا الموت فرض خلينا متفقين
بصلي الشيخ وضحك
وحط في أيدي شوية مسك
سلم بسلام
و مشى لقدام
وسبني بفكر
هو انا فعلا قدمت؟
يعني هلاقي؟
طب لو حتى لقيت
هلقى الخير ولا القى الشر
هلقى الجنة ولا النار
دماغي بتلف فوقت على أذان
أنا أول مرة أعيط كدا
جرا ايه يا غلام قالها الشيخ
متيجي نصلي
كل اللي عاش..عاش بيجري
كلُُ في ناحية
و الدنيا بشويش
عششت جوانا
وحششنا جواها
أدمنا سكوتنا و أغانيها
و الاوضة الضلمة ولياليها
وبقينا عايشين بنعدي الايام
وتعدي علينا
ف هسيبك
ولأول مرة
تكمل حدوتك بأيديك
هتتغير ولا هتفضل
مجرد عابر ع الدنيا
بتخبط فيها وتخبط فيك
وتقف وتبص بدون مبالة
وتقول ببرود و زفير
أسف ع الازعاج
