رؤية وابداع
عشان مندمش
بقلم: شيماء الشربيني
بسيب الحبل عالأخر
وبدي العذر ١٠٠ مرة
ومرة كمان
واسيب الكل علي راحته
هتسأل عني انا موجود
هتبعد برده ليك عذرك
ومبعاتبش مهما ان كان
هرد الكلمة لو حلوة
واطنش لو جرحتوني
واكبّر وابقي مش زعلان
وعلشان عارف اني بشر
ساعات يغلط
بقول آسف
في حالة اني اكون غلطان
وبمشي عالعجين أوقات
عشان خايف علي العشرة
أحسس حتي عالكمة
أحاسب حتي ف غلطكم
ومش ندمان
وبرده الناس بتتمادي
أنا اللي اديتكو بزياده
أنا اللي طيبتي شوفتوها
عبط او لؤم يا إخوان
وعارف كل ده وحافظه
وساكت برده ومبسلَمش
أنا بصبر عليكو بكيفي وارادتي
عشان لو يوم بقيت قاسي
ضميري يسيبني أنام عادي
وابص ورايا ومدمعش
ماقولش يا ريتني كنت صبرت
وكلمة لوم كمان مسمعش
واكتر ماللي انا عملته
مافيش تاني
أنا بعمل ده كله بجد مالأول
عشان مندمش
#شيموفرينيا
إتبعنا
