كنزي مدبولي تدخل عالم الكُتاب

حوار: ياسمين أحمد

 

كنزي محمد مدبولي صانعة محتوى مصرية، ولدت في الإسكندرية وتعتبر واحدة من أشهر وأنجح صناع المحتوى في مصر والوطن العربي.

اشتهرت كنزي مدبولي بفيديوهاتها الكوميدية والتمثيلية، بدأت تقديم محتوى هادف وتوعوي للحفاظ على الصحة النفسية، وكان هذا بسبب تجربتها الشخصية التي جعلتها تدرك أهمية الحفاظ على الصحة النفسية وكيفية التعامل مع الأمراض النفسية دون الاستهانة بها.

كنزي مدبولي صانعة محتوى

حلمها التمثيل ويتضح ذلك من خلال الفيديوهات التي قدمتها في الفترة الأخيرة التي تناقش أهم المواضيع، هي التي تقوم بكتابة الاسكريبت وتقدم جميع الشخصيات بكل احترافية.

أعلنت كنزي مدبولي منذ أيام عن تعاقدها مع أحد دور النشر لإصدار أول رواية لها، ولقي الخبر إعجاب الكثيرين وظهر لديهم الحماس للمعرفة أكثر عن هذه الرواية.

لهذا تواصلنا معها لنتعرف أكثر على هذه الخطوة

_ متى قررتي أن تبدأي في الكتابة؟

سنة 2016 كان قبل امتحانات الثانوية العامة بشهر تقريبًا، وكان عندي أرق من كتر التفكير، وفي يوم حسيت أن عقلي في عالم تاني وبدأت أتخيل قصه ادامي، واتخيل أسماء أبطال وارسم أحداث ليها بشكل خلاني حبيتها أوي وكنت فاكره أنه مجرد تخيل، ولكن بعدها بيومين اتطور عندي افكار ليها فبدأت أمسك الورقة والقلم وأكتب وكان أجمل أحساس بالنسبالي.

_ إيه الدافع من الكتابة بالنسبالك؟

أنا بكتب عشان بحب الكتابة وعشان عندي أفكار مختلفة، ومفيش اي دافع جوايا غير اني أكتب الحاجة اللي بحبها واللي من إبداعي، والدليل إني عندي قصص كتير محدش يعرف عنها حاجه، وأول رواية كتابتها كان عندي قناعة إن محدش هيشوفها غيري.

_ فكرتي قبل كده تعرضي كتاباتك؟

اه، من أول يوم كتبت فيه وأنا عندي رغبة أن الناس كلها تقرأ اللي أنا بكتبه بس مكنتش عارفه أعمل ده إزاي لحد ما بقيت أظهر الموهبة دي لصحابي، أخر ترم في الكلية بدأت أكتب اسكتشات كوميدية لصحابي وصوروها وعجبتهم جدًا وطلبوا مني أكتر، إحنا كنا تيم مكون من 20 بنت وكانوا واثقين في موهبتي جدًا ودي أكتر حاجة ادتني ثقة في نفسي.

_ الكورونا كان لها تأثير إيجابي بسيط لكنزي؟

هي كانت فترة صعبه جدًا بس أنا استغليت الانعزال اللي كورونا عملته في ظهوري على السوشيال ميديا وتقديم المحتوي الكوميدي، وكمان الكتابة.

_ عنوان روايتك إيه؟

هتكون مفاجأة إن شاء الله.

_ كلمينا عن شعورك وأنتي ماسكه الورقة والقلم وبتكتبي؟

أول حاجة الخوف وبحس إني مش هعرف اكتب حاجه وبمجرد ما ببدأ الموضوع بيكون سهل جدًا وكأني بكتب حاجه شايفاها بتحصل.

_ أكتر كاتب بتحبيه؟

أحمد مراد، وأنا عندي 15 سنة سمعت عن رواية الفيل الأزرق وأنها هتتحول لفيلم اهتميت أعرف أكتر عن الموضوع وقرأت الرواية، وكانت أجمل مما تخيلت وخلتني أشوف الأحداث بمجرد القراءة وده كان بسبب شرحه وأسلوبه اللي خلاني أعيش كل تفصيلة، ونزل بعدها رواية19 19 وحضرت حفل توقعها واتصورت مع الأستاذ أحمد، وبعد 8 سنين اتحولت الرواية لفيلم كيرا والجن، وهو من أهم وأجمل الأفلام بالنسبالي وعلقت بوستر الفيلم في أوضتي.

هل الرواية لها علاقة بقصة حياتك؟

إطلاقًا، الرواية من خيالي، وعمومًا الفيديوهات اللي بقدمها بتكون من خلال تجارب ناس حواليا أو حدث تلفزيوني اتاثرت بيه زي ( التحرش، العنف المنزلي، الطلاق، التفرقة الأسرية) دي مجرد تجارب مجتمعية وليست شخصية.

وانتهى الحوار الصحفي مع صانعة المحتوى الشابة الناجحة والمؤثرة كنزي محمد مدبولي مع تمنياتي ” ياسمين أحمد” لها بكل النجاح والتفوق في حياتها، وتقديم التهنئة لها بمناسبة أول رواية لها
وأسرة رؤية وطن بالكامل تتمنى لها التوفيق والنجاح.