أنا موظف

بقلم:سلوى صبح

يا حسرة قلبي..
حكمة ربي.. أنا موظف..
جيوبي من الفلوس فاضية
وإيديا لا تنضف..
من أول ما يجي المرتب ..
وأنا مش لاحق أصرِف..
ولما يخلص في واحد مِنْهُ
بدعي بقلبي يا رب إِلطُف..
قدري ونصيبي أقعد أحسِبها
ومهما حسبتها بلاقيني متكتِف..
وعايش في الديون غرقان ..
بنود الصرف ما بتخلص وأنا برجِف..
عيالي زي عيال الخَلْق لها طلبات
ومش قادر أستِف اللي ما يتستِف..
بقوم و أمشي على رجلاية بس مش نافع..
ولما أتعب على بطني بحاول أزحف..
وَيا ربي لا اعتراض على حكمك
قال يعني لازم كنت أتوظف..
رضيت والله بغُلبي وعلى القدر صابر
مش لازم أفهم بس ..
فهموني إزاي أنا أتصَّرَف..

بالعامية بقول.