بحب رجل غيار

بقلم:سلوى صبح

طمن قلبك ولا تحتار
وإوعى حبيبي عليا تغار
دانتَ الحب وجوه القلب
أصل الحب ده هو قرار
قاعِد شاغِل بالك ليه؟
وهتجنن يابن الإيه
هو القلب مابين صوابعنا
بنحرك فيه ونختار؟
والله بحبك قلبي عَمَار
إسأل عيني ما شافت غيرك
وإسأل روحي مليها بنورك
عمري رهنته برغم غرورك
حتى خصامك بيقهر قلبي
ويزهقني وبشوف غُلبي
وبرده ما غيرك قلبي اختار
أيوة بحبك يابن الإيه
ماشي وعامل نفسك بِيه
إلا عليا إهدى شوية
دانا روحك وهتعمل إيه
وبحِس في طبعك سي السيد
وغباوة وأنا لازم أأييد
وإن قلت ما عييد-ما هعييد
بس إياك وشقاوة أنثى
تخضعً وللحظة ما هتنسى
هتجيبك وتحط عليك
وهترجع في الآخر تهدى
سامحيني أنا آسف يا عنيا
وهاخد حقي شوية شوية
إوعى تقول إن أنا غلبانة
دانا أصلي حويطة وزكية
وأفهمها وهي معدية
وبتهرب من قلبي لفين
دا يا ويلك يانور العين
غيرة وطيب بنعديها
وشقاوة ونتحكم فيها
بس خيانة بضرب رصاص
ونهاية حياتك وخلاص
ولايمكن تصعب عليا
وهقول كان وهم ماله أساس
وأنزع من قلبي الإحساس
بس هقولك دانت أصيل
وما لكش يا واد في التمثيل
وعشق قلبك ليا خطير
يلا نسامح ونعديها
بس حبيبي إوعى تغير.