أبو الليف يتحدث عن تفاصيل خلافه مع أيمن بهجت قمر

 

نادر أبو الليف: مش أيمن بهجت قمر اللي نجحني.. وكان صعبان عليا علشان والده توفى وخدته معايا الاستوديو 

 

كتبت: دنيا عبد الكريم

 

تحدث الفنان نادر أبو الليف عن تفاصيل خلافه مع ابن شقيقته الشاعر أيمن بهجت قمر، مشيرًا بأنه أول من وضع قمر على طريق الفن.

 

إذ قال أبو الليف خلال لقائه مع الإعلامية إنجي هشام في برنامج “المنسي”:
كنت عامل ألبوم اسمه سلف ودين، وده كان أول ألبوم للشاعر أيمن بهجت قمر، واللي بيقول أني معملتش نجاح بعد ما سيبت أيمن بهجت قمر، أنا أسف ليه ولكن مش أيمن بهجت قمر اللي نجحني، ربنا اللي نصفني لأنه عالم بحالي وتعبت وشقيت علشان أوصل لـ ده.

وأضاف:
أنا أول واحد دخلت أيمن بهجت قمر ستوديو، وأنا أول واحد شجعه يكتب أغاني، الكلام ده سنة 1995، هو قريبي وخدته معايا الاستوديو وفي شهود على الكلام ده، وفي إثباتات علشان أنا خاله وكان صعبان عليا أن والده توفى الشاعر والسيناريست الكبير بهجت قمر، وهو ابن أختي وبدأ يقولي والنبي يا خالو خدني معاك ستوديو وأنا عايز أكتب أغاني وغنيلي أغنية.

 

وتابع أبو الليف قائلًا:
خليت خالد سلامة الموزع يقعد معاه ويفهمه الدنيا، وخدت منه أغنية، وبعدين عملت معاه ألبوم كله سلف ودين.

 

كما أشار أبو الليف بأنه ليس هناك علاقة بينه وبين أيمن بهجت قمر في الوقت الحالي، قائلًا:
ودلوقتي علاقتنا اتقطعت خلاص وأنا الموضوع بالنسبة لي لا يعني لي شيء لأن الرزق من عند ربنا مش العبد، فأنا مش من النوع اللي ممكن أخسر دمي علشان جنيه أو شغل، إحنا في دم بينا وقرابة حتى لو هو أنكر ده، أنا مديت له إيدي على أساس أنه ابن أختي، إن كان هو بيقول أن أنا مطرب أغاني هبطة، ولو قولت في حقه كلمة وحشة هبقى أنا كمان كده.

 

واختتم:
أنا لاقيته طالع في برنامج بيقول أنا اشتغلت في بداياتي مع ناس أشباح ومطرب أغاني هابطة، طيب مطرب الأغاني الهابطة ده أنت كنت بتروح معاه الاستوديو تتحايل عليه ليه؟ كنت بتقوله والنبي يا خالو عايز اكتبلك أغنية ليه؟ كل واحد بيبان في الظروف، وربنا يهديه ويديه على قدم ضميره ونيته.

 

والجدير بالذكر يعد برنامج “المنسي” من تقديم الإعلامية إنجي هشام ، ويعرض يوميًا على شاشة هي في تمام الساعة 10 مساءً.