أبرز تصريحات هدى المفتي من برنامج معكم: “مبحبش حد يقلل مني”

ثريا الصاوي 

 

استضافت الإعلامية منى الشاذلي الفنانة هدى المفتي ضيفة في برنامج “معكم”، مساء أمس، وتحدثت عن أعمالها الفنية الأخيرة، والنجاحات التي حققتها في موسم أفلام عيد الأضحى بمشاركتها في 3 أفلام هي كيرة والجن وبحبك وعمهم والعديد من الأسرار الخاصة بحياتها الشخصية.

 

 

وقالت: “مهما بنرتب، الدنيا مابتمشيش زي ما إحنا عايزين بالذات في الشغل، اللي حصل صدفة بحتة، أنا بقالي 3 سنين شغالة على فيلم كيرة والجن، عمهم، بنصور فيه من الصيف اللي فات وكان المفروض ينزل في راس السنة ثم اتأجل لإجازة العيد الصغير ثم للعيد الكبير”.

 

وتابعت المفتي: “وفيلم (بحبك) تامر حسني لما جالي بدأته على طول وأكيد مش هقول لأ لفيلم تامر حسني، الترتيب الأصلي إن كل فيلم كان هيبقى في موسم مختلف، بعدين لقيت بيكلموني إن الـ 3 أفلام نازلين مع بعض، في الاول خوفت عشان كنت عامله حسابي إن هينزل فيلم كل فترة وأنا هريح في النص وأخد أجازة، لكن كلهم نزلوا في وقت واحد فأنا دلوقتي معنديش حاجة خلاص”.

 

وأضافت: “سعيدة جدًا بردود أفعال الجمهور الأفلام التلاتة مختلفين وكل واحد فيهم تحس إن ليه جمهوره، وبصراحة التلاتة ناجحين أوي، قعدوا يقولوا لي أنتي حاطة في بطنك بطيخة صيفي وضامنة إيرادات العيد لكن أنا كنت خايفة إن الناس ميعجبهاش أي دور من الأدوار، كنت خايفة الناس متحبنيش بس الحمد لله”.

 

وتحدثت عن كواليس تعاونها مع المخرج مروان حامد في فيلم “كيرة والجن” قائلة: “أستاذ مروان مخرج مختلف تمامًا، أي حد يتمنى يشتغل معاه، خصوصًا لو هيحطك في دور جديد، زي ما يكون هيصبك في قالب معين وهيشكلك بتشكيلة جديدة، فكنت متأكدة إن هبقى طالعة حاجة صح جدا، وفي العرض الأول للفيلم كنت مبسوطة أوي وحاسة بالرضا عن نفسي وإني قدمت دور مهم”.

 

وذكرت أيضًا عن بداية تعارفها بتامر حسني وأنه كان يشعر أنها متكبرة قائلة:” تامر طلب أنه يشوفني فى الأول ويتكلم معايا قبل الدور، وقالي لما خلصنا كلام أنى طلعت غير توقعاته وفي الحقيقة أحسن، وأنه بيحب يتعامل مع الشخص في البداية لكي لا يحكم عليه بشكل خاطئ”.

 

أوضحت الفنانة هدي المفتي، أن هناك مواصفات لـ الشخص الذي سترتبط به قائلة:” مفيش مواصفات لـ فتى الأحلام، ولكن هناك صفات يجب أن تكون في فتى أحلامي، وهي أن يكون شخص أخلاقي وروحه الجميلة”.

 

 

وتابعت أنها:”لا تهتم بشكل الشخص من الخارج، وأكدت أنها كان لها تجارب عاطفية، وكل شخص كانت تتعلق به يختلف عن الآخر، في الشكل، بحب الشخص بكل عيوبه، ولكن هناك أشياء تتم وبها تنتهى العلاقة، ولا أقبل أن يقلل شخص مني”.

 

وتحدثت الفنانة هدى المفتي عن فترة مرضها قائلة: “رجعت من الجونة بكورونا وكنت من أول الناس اللي جلها كورونا في مصر وخلصت وكنا كويسين ومخدتش الأدوية فحصلي جلطة في الوريد اللي بيوصل للأمعاء بس مكنتش أعرف، كنت بحس بأعراض غريبة وكنت حاسة إني عندي القلب روحت عشان أعمل رسم قلب مطلعش فيه حاجة”.

 

وأكملت حديثها: “سافرت بعدها الأقصر وأسوان وتعبت تعب مش طبيعي، قطعت الإجازة ورجعت بطيارة والموضوع كان صعب ولولا صحبتي كنت ممكن مبقاش موجودة”.

 

وأضافت المفتي: “أما روحت المستشفى الدكاترة مكانوش عارفين فيا إي، وفجأة لقوا بطني بتتنفخ بشكل مش طبيعي، فقالوا لازم نفتح بطنها عشان نعرف السبب، ولاقوا إن فيه جلطة وأما متعالجتش بسرعة عملت غرغرينا، والعملية كان كبيرة وقعدت شهر وشوية ممنوعة الزيارة والأكل والماية”.

 

واختتمت حديثها: “تعلمت العديد من الأشياء والتي كانت من أهمها تحسن علاقتي بربنا”.