“آيتن عامر” للجمهور “شكرًا على حبكم ودعمكم” في حوار خاص لـ “رؤية وطن”

 

حوار/ منار عبد الناصر

*الرقابة في البيت مهمة جدًا

*الأعمال الفنية المحترمة بتساعد في تشكيل وعي الجمهور

*الندم على أي عمل سابق بيبقى ندم نسبي لأن بنخرج بخبرة وتعلم

فنانة مميزة بين فنانات جيلها، لها حضور وشاركت في أكثر من عمل فني مختلف عن شخصيتها وبالرغم من أن شقيقتها الأكبر منها دخلت عالم الفن والتمثيل قبلها إلا أن ذلك لم يؤثر عليها وبدأت منذ الصفر.

ويعد مسلسل حضرة المتهم أبي اول مشاركة درامية لها أمام الراحل نور الشريف وتألقت بمشاركتها في مسلسل كيد النسا أمام الفنانة فيفي عبدة، وبعدها توالت أعمالها الفنية المختلفة حيث نجد لها عمل أو أكثر في كل سنة
ومن اهم هذه الأعمال مسلسل الطوفان والأخ الكبير وبين يوم وليلة وأيوب وأخيرا مسلسل كوفيد 25 مع المتألق يوسف الشريف

بطلة حوار اليوم في رؤية وطن هي النجمة العالمية.. آيتن عامر وهذا ما نص عليه الحوار

هل يوجد عمل ندمتي على تقديمه ؟

اكيد في عمل ندمت على تقديمه بس في الاخر الندم بيبقى نسبي لان انتي اكيد بتخرجي بنسبة خبرة ومعرفة وتعلم، مش دائمًا الندم بيبقى هو الدرس المستفاد لأن انا متعودتش اقعد اعيط على اللي فات، اتعلمت اتعلم من غلطاتي وبالعكس انا بالنسبالي لما بندم على حاجة عملتها واتعلم ازاي اتجنب الغلط ده بعد كده ده بالنسبالي بتبقى الإفادة اهم من الندم كتير جدًا جدًا

انا تابعت فنانين كتير ندموا على أعمال ووقفوا عند النقطة دي وقفلوا على نفسهم، انا شايفة ان ده غلط يعني انت لو حصلك سقطة او سوء اختيار أو.. أو.. انت لازم تقف وتقوم تاني لأن انت فنان وفي الاخر الناس بتحبك وعايزة تبقى في صورة كويسة واحسن فـ لازم تفضل دايما مكمل عشان ترضي الناس اللي بتحبك وتعملهم الحاجات اللي مستنينها منك اكيد.

وجهي رسالة لجمهورك؟

انا شايفة أن الفنان بلا جمهور ده شئ غريب عمري ما شفتها قبل كده
دائمًا الفنان بيكون له جمهور بيحبه وبيدعمه وبينصحه ودايما بيقوله لو عمل حاجة غلط فـ انا شايفة الجمهور ده أهم حاجة في الدنيا احنا بنشتغل عشان نرضيه ونرضي موهبتنا ونرضي نفسنا اللي حابة الشغلانة اللي احنا بنشتغلها

ولكن احنا بنشتغل الشغلانة دي ومحدش بيتفرج طب كده الشغلانة دي هتنجح ،الفنان لما بيعمل عمل ميتشافش بيزعل فـ ما بالك لو فنان معندهوش جمهور.

ما الدور الذي ترغبي في تقديمه الفترة المقبلة؟

نفسي أقدم اي دور جديد عليا مقدمتهوش قبل كده لأن التنوع ده الحاجة الوحيدة اللي بحرص عليها من أول ما اشتغلت

واحب اقول للجمهور شكرًا دائمًا على دعمكم وحبكم لان انا بستفيد جدًا من نصايحهم والحمدلله انا عندي جمهور محترم كبير واكيد دي حاجة انا مبسوطة بيها.

هل التوفيق بين البيت والعمل في الوسط الفني سهل؟

لو اخواتي وأمي مش بيساعدوني معتقدش ان كان هيتم التوفيق بالشكل ده خالص

انا بخاف على ولادي جدًا ومهتمة بـ بيتي أوي وبحب كل حاجة مظبوطة ومعمولة صح ولازم يكون في رقيب حتى لو انا مش موجودة وفي حد بيساعدني بس لازم تكون امي موجودة أو حد من اخواتي موجود لأن الرقابة مهمة جدًا.

ماذا تابعتي من مسلسلات في الموسم الرمضاني 2021؟

تابعت الإختيار وهجمة مرتدة وتابعت حرب أهلية ولعبة نيوتن وضد الكسر والقاهرة كابول

ماذا تقول ايتن عامر عن اعمال هذا العام 2021؟

حقيقي السنادي كان في أعمال كويسة اوي اوي وعملت صدى جميل وانا بتمنى ان شاء الله رمضان الجاي و الاوف سيزون كمان يكون فيهم أعمال أنجح وانجح لأن في الآخر انت كل ما بتقدم عمل محترم كل ما بتشارك في تطوير صناعة ووعي شعب، انت برضو بتشكل وعي شعب بأعمال محترمة.. يعني بتخليهم يفكروا بشكل أعمق ويشوفوا بنظرة أكبر وأوسع.

مراجعة…. مادونا عادل عدلي

اقرأ أيضًا

دميانه راوي في حوار خاص لرؤية وطن”الكتابة موهبتي ولكني أعشق الإذاعة”

هبه عماد في حوار خاص لرؤية وطن ” أظن أن مذاق السعادة يَكمُن في الرحلة ذاتها وليس في النتيجة”

مُتألق الأب الروحي وبدايته مع الجندي.. سطور من حياة محمد نجاتي في عيد ميلاده