متحسدونيش
منار عبد الهادي
مفيش أوجاع هتفضل عايشة طول العمر
مفيش محتاج هيفضل حاني ضهرة ذل وقهر
مسيره فيوم يشوف نفسه
ويفرد قامته وبنفسه
يدوس علي وحدته ويأسه
وراح يخلق حلاه مالمر
يا حسديني على الضحكة
متحسدونيش
دي الضحكة معطوبة
عيونكوا راشقة في قلبي
وشرخاني كما طوبة
أنا الحامل على كتافي
هموم الناس مع همومي
بزيح عنكم هموم يومكم
وبضحك ضحكة مغصوبة
وبختم بالبكا يومي
كأن الدمعة مكتوبة
لكني فدمعي متداري فمتشوفونيش
متحسدونيش
ده لو شفتوني مع حالي هتنعوني
تلموا من هناكو فتات وتدوني
ويا بخت اللي قرضني الضحكة بالإحسان
ده أنا إنسان
مناه مالدنيا دي فرحة
تكون مالقلب
دعيته يا رب
فرحني يا رب لاجل العدل فالميزان
أخدت نصيبي مالاحزان
وللفرحه أنا عطشان
فلو حسدني عالضحكة
تعالوا نبادل الأيام
وأنا واثق هكون كسبان
ومش هرجع عن البيعة
ولا هشكي وأقول ندمان
ولكني ساعتها مش هحسدكوا عالضحة
وبردة هتبقوا حسدني
علي الأحزان.
