تعلم تداول العملات الرقمية للمبتدئين
كتبت فاطمة الكيلاوي
مؤخرًا انتشر علي السوشيال ميديا كلام البعض عن العملات الرقمية، (البيتكوين والإيثيريوم) وناس كتير بدأت تدخل عالم التداول،لكن في الحقيقة الموضوع محتاج فهم وتعلّم قبل أي خطوة، علشان
متخسرش وتكون عارف بتعمل إيه بالضبط.
أول حاجة لازم تعرفها كمبتدئ ، إن العملة الرقمية هي عملة إلكترونية مش ملموسة (يعني مش زي الفلوس اللي في إيدك)، لكنها بتتخزن على الإنترنت، وليها قيمة ممكن تعلى أو تنزل حسب السوق.
وعلشان تبدأ في العالم ده ، لازم تفهم إيه هو التداول . التداول يعني إنك تشتري العملة بسعر منخفض، وتبيعها لما سعرها يعلى، وتكسب من الفرق ( يشبه البورصة ولكن في الحقيقة هو مختلف تمامًا ).
بس قبل أي حاجة، لازم تتعلّم التحليل، سواء تحليل فني (بتقرأ فيه حركة الأسعار والرسوم البيانية) أو تحليل أساسي (بتتابع فيه أخبار السوق والعوامل اللي بتأثر على السعر).
كمان مهم جدًا تختار منصة تداول موثوقة، وتبدأ بمبلغ صغير في الأول، علشان تتعلم من التجربة من غير ما تخسر كتير.
وخلي بالك، التداول مش لعبة حظ، محتاج صبر وتخطيط، لأن السوق ساعات بيبقى سريع ومليان تقلبات.
وفي نقطة ناس كتير بتغفل عنها وهي إدارة المخاطر، يعني متحطش كل فلوسك في صفقة واحدة، ودايمًا خلي جزء احتياطي لأي طارئ ، وكمان بلاش تخليها وظيفتك الأساسية ، خلي حياتك مستقرة بعيدًا عن التداول والحظ .
ابدأ بالتعلّم الأول، شوف فيديوهات، واقرأ مقالات، وجرب بحساب تجريبي قبل ما تدخل بفلوس حقيقية. ومع الوقت والخبرة، هتتعلم إزاي تفهم السوق وتتصرف بحكمة.
