أسباب اللهاث عند صعود الدرج
كتبت فاطمة الكيلاوي
من فترة بدأت ألاحظ إنّي كل ما أطلع الدرج بسرعة بحس بنفَس بيضيق أو لما بكون بتكلم ، بحس كأني جريت مسافة طويلة، الفضول خلاني أبحث وأقرأ من أكتر من مصدر علشان أفهم
اللهاث هو تغير في وتيرة الشهيق والزفير، بحيث يصبح معدل الأنفاس المأخوذة في الدقيقة الواحدة أعلى من المعدل الطبيعي .
ليه بنلهث لما نطلع الدرج؟
هل اللهث عند طلوع الدرج طبيعي ولا علامة إن في مشكلة صحية؟
بعد بحث أتضح أن الموضوع له أسباب كتيرة (منها الطبيعي، ومنها اللي محتاج تدخل طبي ).
الأسباب الطبيعية
أثناء صعود السلم الجسم بيحتاج كمية أكبر من الأكسجين علشان العضلات تشتغل وتنتج طاقة.
القلب بيبدأ يضخ الدم بسرعة أكبر، والرئتين بتوسع علشان يدخل هواء أكتر.
لكن لو الشخص مش متعود على المجهود أو لياقته قليلة، بيحصل خلل بسيط بين كمية الأكسجين المطلوبة والموجودة فعلاً في الجسم، وده اللي يسبب اللهاث المؤقت.
كمان الوزن الزائد من الأسباب اللي بتخلي صعود السلم أصعب، لأن الجسم بيحمل نفسه فوق طاقته، فالقلب والرئة بيشتغلوا بمجهود أكبر.
الأسباب المرضية
بعد القراءة والبحث المستمر في الموضوع اكتشفت إن في حالات بيكون فيها اللهاث مش طبيعي، خصوصًا لو بيحصل من أقل مجهود.
من أهم الأسباب :-
1- ضعف اللياقة القلبية أو أمراض القلب منها ( ضيق الشرايين أو فشل عضلة القلب)،لعدم وصول الدم بشكل جيد للعضلات.
2- مشاكل في الجهاز التنفسي (الربو أو الالتهاب الرئوي أو انسداد الشعب الهوائية)، لانه بيقلل كمية الأكسجين اللي بتدخل الجسم.
3- الأنيميا (فقر الدم) :-لأن الدم بيكون فيه نقص في الهيموجلوبين اللي بينقل الأكسجين.
4-القلق والتوتر :-المدهش إن الحالة النفسية كمان ليها دور، لأن التوتر بيزود ضربات القلب والتنفس حتى من غير مجهود كبير.
متى يكون اللهاث مقلق؟
لما يبدأ يحصل من أقل مجهود، أو يصاحبه ألم في الصدر، أو دوخة، أو خفقان شديد. في الحالة دي لازم نراجع الطبيب فورًا علشان نعرف السبب الحقيقي.
نصائح لتقليل اللهاث
ممارسة رياضة خفيفة يوميًا (حتى المشي نصف ساعة).
تقوية عضلات القلب والرئة بالتنفس العميق وتمارين الكارديو.
تجنب صعود السلم بسرعة، خصوصًا بعد الأكل أو أثناء التعب.
المتابعة الطبية لو في أمراض مزمنة أو شك في فقر الدم.
