أول مصرية تحقق ميداليتين عالميتين في المصارعة.. سمر حمزة تتحدث عن رحلتها الملهمة”
أول مصرية تحقق ميداليتين عالميتين في المصارعة.. سمر حمزة تتحدث عن رحلتها الملهمة”
حوار أحمد سالم
تُعتبر البطلة المصرية سمر حمزة نموذجًا ملهمًا للإصرار والنجاح في عالم الرياضة، حيث شقت طريقها وسط تحديات كبيرة لتصبح واحدة من أبرز نجوم المصارعة النسائية في مصر والعالم العربي، أثبتت سمر أن الطموح والعمل الجاد قادران على تحقيق المستحيل، متحدية كل القيود التي قد تواجه الفتيات في مجالات الرياضات القتالية.
في هذا الحوار، نقترب من سمر حمزة لنتعرف على أسرار نجاحها، التحديات التي واجهتها، وخططها المستقبلية التي قد تشمل فيلمًا يروي رحلتها الملهمة.
كيف بدأت رحلتك مع المصارعة ومتى شعرتِ أن هذا هو الطريق الذي تريدين السير فيه؟
بدأت مصارعة آخر 2013، كنت بتفرج على مصارعة أولمبياد 2012 في التلفزيون وعجبتني، وكنت حابة إني ألعب مصارعة، وقبلها كنت بلعب كاراتيه ومكملتش فيه.
روحت نادي كان بيمرن مصارعة بالصدفة في روحت اتمرنت، ومن ساعتها وأنا بقيت اتمرن مصارعة.
المصارعة ليست رياضة شائعة للبنات في العالم العربي، كيف تحديتِ هذه الفكرة واخترتِ هذه الرياضة؟
المصارعة فعلاً مكانتش منتشرة خالص، خصوصاً إن الناس كلها بتقول إن دي لعبة ولاد بس أنا دائماً بحب أعمل كل حاجة مختلفة، وحبيت أبقى مختلفة، لحد ما بقيت سمر حمزة.
من كان أول داعم لكِ في مشوارك الرياضي، وكيف ساعدكِ هذا الدعم في تخطي العقبات؟
أول داعم ليا في مشواري هما أهلي كانوا بيشجعوني دايمًا ألعب رياضة، وكنت بتخطى العقوبات بنفسي مفيش حد بعينه، كل مابفتكر إن أنا أبقى عايزة حاجة كويسة وأعمل نتائج كويسة مش بسمح لحاجة تضايقني أو أنها توقفني عن حلمي.
كيف تتعاملين مع الانتقادات المجتمعية أو الأفكار النمطية حول ممارسة البنات لهذه الرياضة؟
أنا مش بسمع لأي إنتقادات خالص وباخد الموضوع بدافع إن أنا أثبتلهم إن مفيش حاجة اسمها بنت وولد في الرياضة، بالعكس ساعات البنات بتحقق حاجات أكتر من الولاد.
هل شعرتِ في أي وقت بأنكِ بحاجة للتوقف أو التراجع وكيف تغلبتِ على هذه الأفكار؟
كتير حسيت إني عايزة أوقف، وساعات بتيجي لكل واحد لحظة يأس بس كنت بتغلب عليها بحلم إني عايزة أعمل حاجة محصلتش أو يفضل التاريخ ذاكر إن سمر حمزة أول بنت تعمل ميدالية في بطولة العالم، وإن شاء الله هبقى أول بنت تعمل ميداليات في الأولمبياد.
حدثينا عن شعورك عندما حصلتِ على الميدالية الفضية في بطولة العالم للمصارعة؟
لما جيبت الفضية في بطولة العالم ده كان شعور ميتوصفش، بدأت إن أبقى في أول الطريق إني بحقق حلمي ودي كانت تاني ميدالية ليا في بطولة العالم وكنت بحلم إني أجيب دهب مش فضية كمان.
ما هي أصعب مباراة خضتها في مسيرتكِ وكيف تمكنتِ من تحقيق الفوز فيها؟
أصعب مباراة خضتها كانت سيمي فاينال في بطولة العالم اللي جيبت فيه تاني بفضل ربنا فوزت وانتصرت في الآخر.
ما هي البطولات التي تفتخرين بها أكثر من غيرها ولماذا؟
البطولات اللي بفتخر بيها هي بطولات العالم، دي أقوى حاجة في المصارعة ومفيش بنت أصلاً جابت ميدالية بطولة عالم قبل كده وأنا جايبة ميداليتين، كان إتحاد المصارعة ليها 11 ميدالية من ساعة ما اتنشأت المصارعة في بطولات العالم، أنا ليا ميداليتين فيهم.
هل لديكِ لحظة فارقة في مسيرتك الرياضية تشعرين بأنها نقطة تحول؟
نقطة فارقة في مسيرتي، لحظة ما بكون واقعة خالص وحاسة بالاحباط ومرة واحدة بعمل إنجاز محصلش والناس كلها بتتكلم عليه.
كيف تستعدين نفسيًا وجسديًا قبل دخول الحلبة؟
بستعد بأني بفتكر كل العقبات، الانتقادات، وتعبي، وبدخل الماتش بهدف إني لازم أكسب
ما هو الروتين اليومي لسمر حمزة في التمرين والتدريب؟
روتيني اليومي حسب فترة التدريب هل دي فترة إعداد هل هو يبقى 2 تمرين واحدة الصبح وواحدة بليل، وفي فترة المنافسة بننزل بالحمل فترة عادية أو بنطلع بالحمل وعلى حسب البطولات اللي أنا داخلة عليها.
ما الذي يدفعكِ للاستمرار حتى في الأوقات التي تشعرين فيها بالإرهاق؟
إنه حلمي إن أنا عايزة أجيب ميداليات في الأولمبياد ومش أي ميدالية.
كونكِ أول مصرية تحقق إنجازات كبيرة في المصارعة، كيف تشعرين بمسؤولية كونكِ مصدر إلهام للأجيال الجديدة؟
مسؤولية إن أول مصرية تحقق إنجازات ومسؤولية إن أفضل أيقونة للأجيال بتاعتي، إن اتعدى الصعوبات، وإن مفيش حاجة تقف قدامي أو حاجة تحبطني، وأفضل أحقق لحد ما أوصل لحلمي عشان الناس تتعلم إن مفيش حاجة ممكن توقف حد عن حلمه، حتى لو فيه إيه حواليه.
هل تشاركين في مبادرات لدعم وتشجيع الفتيات على دخول عالم الرياضة؟
أنا مشاركتش في مبادرات كتير، بس لما بيكون في حوار صحفي أو برنامج دايمًا بنصح البنات والأطفال الصغيرين إن هما ميستغنوش عن حلمهم ويفضلوا ورا اللي هما حاسين بيه عشان يقدروا يوصلوا لحلمهم.
من هي البطلة أو الشخص الذي يلهمكِ ويجعلكِ ترغبين في التطور؟
نفسي هي اللي بتخليني اتطور من نفسي، لأن مفيش حد هيديك دافع غير نفسك وإحساسي إني هبقى بطلة وبطلة عالم والحمد لله وصلت ليها، وإحساسي إني بطلة أولمبياد حاسة بيها وهعملها بإذن الله.
ما هي أهدافكِ وطموحاتكِ المستقبلية في عالم المصارعة؟
إن شاء الله هشتغل على أولمبياد 2028 بكل طاقتي، وإحساسي إن أنا إن شاء الله أعمل ميدالية.
هل لديكِ خطط لتطوير رياضة المصارعة النسائية في مصر أو العالم العربي؟
والله أنا نفسي أعمل إكاديمية بإسمي، إدي كل اللي أنا عرفته واكتسبته من خبرات خارج مصر وداخل مصر للجيل اللي طالع.
كنتِ قد ذكرتِ أنكِ تفكرين في عمل فيلم عن قصة حياتكِ، خاصة بعد نجاح قصتكِ في مسلسل “إلا أنا” مع هداية ملاك وفريال أشرف وما هي الرسالة التي تريدين إيصالها من خلال الفيلم؟
موضوع الفيلم أتعرض عليا بس مستنيه أعمل ميدالية أولمبية.
كيف ترين الفرق بين تقديم حياتكِ في فيلم سينمائي وبين العمل التلفزيوني السابق؟
الفيلم هيبقى بيتكلم عن سمر بس والحاجات المؤثرة فعلاً هي اللي هتظهر، كل ما تقدم للناس الصعوبات والعواقب الموضوع بيفرق كتير، مش بنجيب الحلو بس.
كيف توفقين بين حياتكِ الشخصية وحياتكِ المهنية كرياضية محترفة؟
اه طبعًا بوفق بينهم، وبحاول بقدر الإمكان أوفق بين الإتنين.
كيف يراكِ أصدقاؤك وعائلتك بعيدًا عن دوركِ كبطلة مصارعة؟
هما شايفني عادي، أنا سمر برا المصارعة غير جوا المصارعة، وبحاول أفصل الشخصية.
ما هي الرسالة التي توجهينها للفتيات اللواتي يطمحن لدخول مجال المصارعة أو الرياضة عمومًا؟
خليكي دايمًا ورا إحساسك اللي إنتي حاساه، إنك تقدري تعملي حاجة أيًا كان المجال هتوصلي ومتيأسيش.
كيف ترين مستقبل المصارعة النسائية في العالم العربي؟
في تطور كبير جداً وفي انتشار كبير، في بطلات كتير طلعت، وإن شاء الله نشوف أبطال عالم موجودين قريب.
إذا كان بإمكانكِ توجيه كلمة واحدة لنفسكِ الصغيرة التي بدأت طريقها في المصارعة، ماذا ستقولين؟
أنا مبسوطة جداً باللي وصلتله، وهتبسط أكتر لما أجيب ميدالية في الأولمبياد إن شاء الله.
