ولاء الشريف عن عقبالك يا قلبي: “دوري فيه حقيقي وبيلمس بنات كتير”
ولاء الشريف عن عقبالك يا قلبي: “دوري فيه حقيقي وبيلمس بنات كتير”
كتب: ياسر خالد
خلال مهرجان القاهرة السينمائي الدولي في دورته الـ45، برئاسة النجم حسين فهمي، تم عرض فيلم “عقبالك يا قلبي” للفنانة ولاء الشريف والفنان علي الطيب، والذي نافس بمسابقة الأفلام القصيرة مع مجموعة كبيرة من الأفلام، منها أبو جودي، زيتونتي، كعب عالي، أمنية أخيرة وغيرها.
وعلى هامش عرض “عقبالك يا قلبي” بالمهرجان، كان لـ رؤية وطن هذا اللقاء الممتع والشيق مع بطلة العمل ولاء الشريف، والتي تحدثت لنا خلاله عن دور فريدة الذي جسدته فيه وتفاصيل تحضيرها للشخصية، كما كشفت لنا أيضًا عن أحدث أعمالها الفنية.
ولاء الشريف: “حسيت إن فريدة شبه ناس كتير في مجتمعنا”
فعن شعورها بعرض فيلم من بطولتها في مهرجان القاهرة ومن قبله في مهرجان مالمو وحصوله على جائزة فيه، قالت ولاء: “والله مبسوطة أنا طول الوقت وأنا بحضر حاسة قلبي بيدق، إحساس جديد مختلف، مشاعر جديدة خالص عليا”.
وأضافت كاشفة عن سعادتها بالدور وردود الأفعال عليه، قائلة: “الدور كنت مبسوطة منه جدًا، وهو دور حقيقي أوي، بيلمس بنات كتير أوي”.
وتابعت: “فكنت مبسوطة وأنا بعمل الدور ده، لأنه حسيت إن فريدة دي شبه ناس كتير أوي في مجتمعنا، فمبسوطة أوي وحتى ردود الأفعال بعده مبسوطة أوي بيها”.
وأوضحت ما إذا كان يقلقها أن يكون الفيلم طويلًا أو قصيرًا، قائلة: “لأ خالص، اللي بيقلقني الدور، بس هو ده أكتر حاجة تقلقني”.
ولاء الشريف: “المخرجة شيرين مجدي دياب حد متمكن جدًا وواثق من أدواته”
وتحدثت ولاء بشأن قلقها من أن مخرجة الفيلم شيرين مجدي دياب لا تزال في بداية مشوارها الفني، موضحة: “لأ خالص، بالعكس هي لما حكتلي الفكرة وعرفت إنها اللي كاتباها وهي اللي هتخرجها وقعدنا واتناقشنا، حسيت إنها حد متمكن جدًا وواثق من أدواته”.
وأردفت: “وبعدين فكرة إن حد جديد دي بقت قديمة أوي، لأن فيه دلوقتي مخرجين لأول مرة بيخرجوا بنبهر جدًا وأنا بتفرج عليهم، بالعكس دي حاجة لذيذة أوي”.
كما تحدثت أيضًا عن أكثر ما تهتم به في المخرج الذي تعمل معه، كاشفة: “أكتر حاجة بحبها في المخرج إنه يكون بيوجه الممثل كإحساس، مش يديني أداء، أنا مابعرفش أقلد أنا ممثلة، أنا بشتغل على إحساسي أنا”.
وأكملت: “فأكتر حاجة تهمني إني أحس إنه لامسني ولامس الإحساس اللي أنا حاساه، أو إحساس مختلف من وجهة نظره بس يخليني أشوفه فأحسه فأقوله، لكني مش جاية أقلد”، لافتة: “دي أكتر حاجة بتبسطني وإنه يكون عنده رؤية كمان”.
وأوضحت سر أن النسبة الأكبر من أعمالها في الدراما وأنه يمكن اعتبار أن السينما ليست في حساباتها، قائلة: “لا مش مش في حساباتي، فيه حاجات بتيجي بس مش بتعجبني فمابوافقش عليها، لأنها مش هتضيفلي وبحس إنها مش هتعلم، أدوار عادية شبهي أوي أو عملتها قبل كده”.
ولاء الشريف: “أول ما قرأت نوجا في يا تهدي يا تعدي قلتلهم لأ”
وتطرقت ولاء بالحديث عن دور نوجا، الذي قدمته في فيلم “يا تهدي يا تعدي”، موضحة: “هي كاركتر لذيذ أوي، وبعدين أنا أول ما قرأت الدور أنا قلتلهم لأ”.
لافتة: “كانت آيتن عامر اللي قالتلي اقرأي سريعًا، علشان أنا عمالة أقنع المخرج إن هي ولاء اللي هتعمل الدور ده، وهو يقولي لأ ولاء وشها بريء مش هتعمل كده”.
وواصلت: “فقلتلها لأ يا آيتن أنا مش هعمل كده، قالتلي لأ بس اقرأي وصدقيني الدور مافيهوش حاجة، أنا أول ما سمعت إنه دور فتاة ليل، أنا قلت استحالة أعمل كده”.
واستكملت: “بس لما قرأت، لقيت الموضوع لذيذ مافيهوش أي حاجة ممكن يطلع منه شغل لذيذ، قعدت اشتغلت على الدور أنا وزميل ليا مصطفى عمر، هو ممثل وسيناريست جدًا، وهو مشارك حاليًا في مسلسل رقم سري، وبصراحة هو ساعدني في الدور جدًا جدًا”.
وأعربت ولاء أنها كانت سعيدة بالدور لأنه كان مختلفًا، قائلة: “واتبسطت جدًا لأنه كان دور مختلف، ماعملتش فيه أي حاجة خارجة والناس طلعت مبسوطة، وكل اللي بيشوفه بيقولي مش أنتي”.
ولاء الشريف: “مبسوطة إني غيرت جلدي في نوجا وعملت حاجة ماعملتهاش قبل كده”
متابعة: “فدي حاجة لذيذة إني كممثلة أغير جلدي أو إني أعمل حاجة ماعملتهاش قبل كده، أو دور كوميدي كمان، يعني هو الحمد لله ده اللي باسطني، إن الناس مبسوطين وضحكوا”.
ولفتت: “وكان عندها برضو تاريخ للشخصية، إنها حاصل معاها حاجة، فيه مشهد كده فيه لحظات تراجيدي معينة، فكان الموضوع لذيذ أوي على بعضه”.
وحول أن نوجا كانت تقود السيارة حافية القدمين قبل مسلسل نعمة الأفوكاتو، ولماذا أن الأمر حظى بانتشار واسع بعد المسلسل، قالت ولاء: “آه ده حقيقي فعلًا، أنا شخصيًا فيه شبشب في العربية موجود، بس يمكن ماكنش حد مركز أوي على الموضوع”.
وعن سبب أن الأمر أصبح عليه تركيز شديد بعد مسلسل نعمة الأفوكاتو، أوضحت: “أيوه ده حقيقي، لأنه فعلًا المسلسل الحمد لله نجح نجاح كبير جدًا في كل العالم”.
ولاء الشريف: “بصور مسلسل فات الميعاد مع أسماء أبو اليزيد وأحمد مجدي وأحمد صفوت”
عما إذا كنا سنشاهدها خلال رمضان القادم، كشفت: “فيه حاجة بس لسه مش بشكل رسمي، فمش عارفة أتكلم عنها”.
وبشأن ما إذا كان العمل كوميديًا أم تراجيديًا، وعما إذا كانت تفضل الأعمال التراجيدية عن الكوميدية، صرحت: “لأ خالص والله، هو حسب اللي بيتبعتلي وبيعجبني هو ده اللي بعمله”، موضحة أنها العمل المعروض عليها ليس كوميديًا وإنما عمل اجتماعي.
وكشفت ولاء عن أحدث أعمالها الفنية، قائلة: “الفترة دي بصور فات الميعاد مسلسل لـ أسماء أبو اليزيد وأحمد مجدي وأحمد صفوت ومجموعة كبيرة أوي”، مشيرة: “بقدم فيه دور لذيذ أوي ومختلف شوية وهيتعرض الفترة اللي جاية، ويارب يعجب الناس”.
ولاء الشريف: “إيمان ماعتزلتش وإن شاء الله تشوفوها في رمضان الجاي”
وأيضًا تحدثت ولاء الشريف حول ارتداء شقيقتها الفنانة إيمان الشريف للحجاب، وعما إذا كانت قد ارتدت الحجاب فقط أم ارتدته واعتزلت، موضحة: “هي ماعتزلتش، وإن شاء الله إن شاء الله فيه حاجة جايالها بالحجاب برضو”.
لافتة: “هي آخر دور كانت عاملاه بالحجاب في صوت وصورة، هي صدفه، والحمدالله هي جت في توقيتها، هما كانوا عايزينها في دور تاني خالص، فهي لما اعتذرت وقالتلهم أنا اتحجبت، بعتولها دور تاني”.
وأتمت الفنانة ولاء الشريف تصريحاتها، قائلة: “بس سبحان الله هي خط وة جايلها في وقتها، خطوة لذيذة أوي، إن شاء الله تشوفوها في رمضان”.
