لمياء الأمير: بقالي 3 سنين بشتغل ضيفة شرف وبعتبر نفسي معتزلة
مادونا عادل عدلي
تحدثت وقالت الفنانة لمياء الأمير، عن قلة أعمالها الفنية خلال السنوات الماضية، بجانب الحديث عن الدكتور أشرف زكي نقيب المهن التمثيلية.
حيث قالت لمياء الأمير في لقائها مع الإعلامية إنجي هشام، في برنامج “المنسي”، المذاع عبر شاشة قناة “هي”: أنا مش سبب في اختفائي، بيتعرض عليا أدوار كلها ضيفة شرف بقالي 3 سنين بشتغل ضيفة شرف، وأنا مستغربة وكنت في سنة من السنين كنت بعمل طرف تالت وكاريوكا ونيران صديقة، كنت بعمل في رمضانات اللي فاتوا كنت بعمل بالأربع مسلسلات، وقبل آخر 3 سنين كان في سنتين قاعدة فيهم مبشتغلش ومتسألنيش عن السبب لأن جيلي كله قاعد في البيت.
وإستكملت: أنا اعتقد أن المخرجين كلهم شباب ومش عارفينا ولا اشتغلوا معانا ومش مهتميين، وأنا مبقاش عندي أمل في الوسط وعلشان مضايقش نفسي بقول خلاص اعتبري نفسك معتزلة، لو جه شغل تمام ولو مجاش خلاص، وأنا مبحبش أرفع التليفون على حد أبان أني قليلة وأخد فلوس قليلة وأتعامل بشكل مهين لأني أنا اللي بطلب.
وتابعت الفنانة : أنا ليا صحاب كتير ممثلين ومخرجين بقيت أبعت لهم في الأعياد علشان يفتكروني، لكن مستحيل أبعت لحد أني عايزة أشتغل، والدكتور أشرف زكي هو أحسن نقيب في الدنيا، وهو دفعتي في المعهد وصديق عزيز.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.