تصريحات رئيس الزمالك بشأن الملفات التي كانت تواجه النادي

كتب : محمود سامي

أدلى الكابتن حسين لبيب رئيس نادي الزمالك تصريحات تليفزيونية أذيعت عبر شاشة قناة الزمالك، وذلك من أجل الحديث عن الملفات الشائكة التي كانت تواجه المجلس خلال الفترة الماضية.

وبدأ حسين لبيب تصريحاته قائلاً: الزمالك مؤسسة تدار بشكل جماعي، وإذا كان هناك رأي صائب من أحد أعضاء المجلس لا نسعى لطمسه أو إخفاؤه بهدف البحث عن الشو.

وأضاف: رغم انتمائي لأسرة كرة اليد، لكن كرة القدم هي التي جعلتنا ننتمي للزمالك، مع تقديري لكل ألعاب الصالات التي تضم أساطير مثل أحمد الأحمر ورضا هيكل، لكن كرة القدم هي أساس النادي.

وبحديثه عن ملف تجديد أحمد فتوح رد لبيب قائلاً: هتكلم عن فتوح مش معقول كمية الإشاعات اللي طلعت وبعض الإعلاميين قالو مضى للأهلي ٣ سنين مش معقول كده ياجماعة انتو ليه بتوقعوا الأندية في بعض وهو أصلًا موقعش غير في الزمالك ليه نطلع فتوح راجل مادي وعاوز أكتر من فلان وتوقع الفرقة في بعض وأنت كل همك تعمل شو و بس.

وأكمل: يجب أن نحافظ على معايير نادي الزمالك وتاريخه ورموزه، واستلمنا النادي وبنيته التحتية سيئة والمواصفات الهندسية غير جيده وكل شئ سيعود كما يتمنى الجمهور، أعدنا اسم حلمي زامورا للاستاد.

وعن ملف المدير الفني تحدث رئيس الزمالك قائلاً: بالنسبة للمدير الفني أول ما جيينا مغيرناش على طول وقعدت مع أوسوريو مرة واتنين وثلاثة وأنا مش من الناس اللي بتحب تغيير مدرب والموسم شغال بس ده كان قرار مجلس إدارة بالإجماع وأظن أنه كان قرار منطقي عشان هو مكنش ينفع يكمل، قعدنا نسمع كمية فتي عن المدربين وفلان وعلان بس أنا مبسوط أن النادي بقى مطلوب زي زمان والنادي معروف أنه هيدفع و بقى ملتزم و بقى الناس عاوزة تيجي النادي.

وواصل: عانينا في عقد مستر أوسوريو عشان كان عنده شهرين أو ثلاثة متأخرين وكان في شرط جزائي حوالى ٤٥٠ ألف دولار وقعدنا معاه واتفقنا ونزلنا المبلغ وخدهم عشان ميرجعش بقضيه جديدة.

واستكمل: عندنا في عقد مستر جوميز شروط بطولات معينة لو قدر يحقق اللي إحنا عاوزينه هيكمل معانا سنة كمان مش هيقدر هيمشي من غير شروط جزائية.

وعن ملف فك القيد قال لبيب: وعدنا بقدرتنا على فك القيد في كرة القدم، وكان من أصعب الملفات التي واجهتنا بسبب طلب 2 ونصف مليون دولار، لكن تمكنا من إنجاز ذلك بعد تكاتف الزملكاوية وليس مجلس الإدارة فقط، كان علينا 14 قضية من قبل أندية ولاعبين ومدربين، فكان يجب الوصول لتسوية أو دفع الأموال، وكان من أنجح من تعامل في هذا الملف هو عمرو أدهم وهاني برزي وحسين السيد وتمكنوا من حل جميع الأمور.

وتابع: كان عندنا ملف دفع مستحقات للاعيبين حوالي ٤٠ مليون جنيه و ٥٠٠ ألف دولار وزيزو وتجديد تعاقد ليه نفتح الموضوع ولسه عقده سنه ونصف وكابتن زيزو ده عاشق للزمالك وجمهور الزمالك بتعملو لينا مشكلة ليه أصلًا هو أصلًا محدش فاهم حاجة ولا قارئ عقود بس بيتكلمو وخلاص وساعدنا في الموضوع ده كابتن زيزو ووالده وأحنا بتربطنا بيه علاقه كويسه جداً و علاقته بالجمهور رائع وأحنا سددنا جزء كبير من المستحقات أو فعلياً تم دفع كل المستحقات السابقه لكرة القدم.

وأردف: النادي أساسه البطولات في جميع الألعاب، بالتالي هدفنا كمجلس إدارة هو الدخول في جميع البطولات والفوز بها، كرياضي أعرف ذلك فقط كفوز شريف وليس عن الظلم وأجبر الجميع على احترام نادي الزمالك.

واستكمل رئيس الزمالك تصريحاته قائلاً: يهمني أننا كلنا نبقي خلف الشعار وكل الجماهير عندنا واحد مفيش تفرقه و مفيش فرق بين أعضاء الجمعية العمومية سواء قديم أو جديد أحنا بنسمع لكل آراء الجماهير.

وأكمل: الجمهور من حقه يعترض ويقول رأيه بس مش هنمشي على هواه لأن الرؤية قدامنا أوضح وفي خبايا مش ظاهرة بس أحنا لو الجمهور على حق أكيد بناخد رأى الجمهور.

وشدد: نادى الزمالك مبقاش على المشاع زي زمان دلوقتي لو الكلام مش طالع من المتحدث الرسمى مش هيبقي حقيقي.

واختتم رئيس الزمالك تصريحاته قائلاً: ياريت تساعدونا أحنا بنغيير خلفية متاخدة عن النادي من ١٥ سنه وأحنا بنحاول نغييرها للأفضل.

في النهاية بختم بأن الزمالك أولًا

عاش الزمالك أكبر قلعة رياضية