يا حبيبتي

سلوي صبح

هي أمي كل حاجة

في حياتي أحلى حاجة

وكل مادى لما بكبر

بفتكر حنانها أكتر..

بنتي سلوى حِتة مني

يا سلام لما تقولها

حب الدنيا عليَّا يمطَّر..

أمي حتى لما تكشَّر

يا جمالها بتبقى سُكر

ضحكتها ياسمين وعنبر..

لو قالوا لي إني شكلِك

وملامحي حتة مِنك

أنا أصلي الحلوة بنتك

ببقى ماشية أتمختر..

بتشوفيني بقلب أم

كله حُب وحنان يضم

مسحة من إيدك عليَّا

ترفع عنِّي كل همّ ..

صبر كل الدنيا فيكي

وإيمان الكون ماليكي

عارفة أحلى حاجة فيكي

ابتسامتك

لاء حنانك

ولا قلبك

وكلامك

ولا أكلك

وسلامك

طب أقول أكتر يا أمي

أم سلوى

يا حبيبتي

يسعدك ربي

يا ست الكل إنتِ

إن كتب ربي يوم في عمري

أتمني حُب بنتي

زي ما حبيتك إنتِ

يا حبيبتي..

سلام من قلبي ليكي

عمري فدا تراب رجليكي

دعوتي يا غالية ليكي

في جنان الخُلد تبقي

بعد ميت مليون سنة

صحة وهنَّا

يا حبيبتي..

مراجع لغوي:دعاء الزغبي

اقرأ أيضاً: 

نهر العطاء

يا حبيبتي يا أمي

سجين