رؤية وابداع

 لكل راجل دق بابها

سلوى صبح

لكل راجل دق بابها

وراح خطبها

لو طلبتها من أبوها

ناسبت اللي اسمه أخوها

قطفت وردة من جنينة

كل إيد كانت بترويها

مفروض عليك إنك تراضيها..

دي قارورة قال نبيها

تنكِسر لو قسيت

في يوم عليها..

هي بنتك بالتبني

هي أختك بالتمني

هي أمك لو أردت

يا جدع ده إنتَ راجلها ..

شايلة اسمك

حافظة عرضك

كل يوم بتلبي طلبك

شيل على راسك جميلها

داإنت يا راجل حبيبها..

خليك حنين

تقي وهيِّن

اوعى تظلمها وتهينها..

الكلام زي الرصاص

ومراتك قطعة من الماس

بالهداوة معاها دايمًا

بالقساوة ليه تعاقبها..

يا تكون سندها

عشان نصيبها

يا إمِا تبعد أو تسيبها..

أيوة سيبها

لو تكون شيلة عليك

هتبقى أحلى

في أي عين غَيْر عينيك

برده جايز حد غيرك لو أذيتها

بالحلال يدق بابها..

لو شفت كل عيوبها

غيرك يتمنى يراضيها

وعينه تشوف

كل عيب إنتَ شفتُه فيها ميزة

عشان مقدرها وراغبها..

اللي ترضاه على أختك

أو قريبتك ترضاه ليها

راعى ربك بس فيها

ليه تزعلها وتبكيها

دي حبيبتك لازم تصونها..

لما تزعل ويزيد غضبك

تتحملك

لو نقص رزقك

هتساعدك بكل ما تملُك

تمد إيديها بكل خير ليك

هتقف جنبك في كل محنة

وتشيلك وترحمك

المهم تكون حاببها..

الست دي أم عيالك

ورأس مالك

حالك ومحتالك

كل ده علشان راجلها

فهمت يا نصيبها

خليك حاببها..

اقرأ أيضاً: 

نهاية الحلم

أنا بحبك

وحشتيني

مقالات ذات صلة

زر الذهاب إلى الأعلى

أنت تستخدم إضافة Adblock

لديك مانع اعلانات فضلآ قم بتعطيله لتستطيع استخدام موقعنا