تعظيم سلام
داليا يحيي
خلص الكلام ؟
طب هوس سكوت
علي واد فافي وبنت كيوت
علي ذكري وغنوة وشجرة توت
علي ناس عايشة وويلها ويلين
علي ناس بتبيع في دقيقتين
يا زمان غدار قاسي وهلفوت
توت توت
كان حلمك حلم زغنطوط
بس تعيش الفرحة بجد
ولا تسند روحك علي حد
والحلم أهو ضاع
وأهو كله أيام وساعات وتفوت
والكل بيجري وبيصارع
توت توت
دراوييش عايشين بلسان مربوط
ماشيين الدنيا بالعكس
وسؤال أهبل عن فرخة وبيضة وكتكوت
في ناس تتباهي بمصايبها
غيرها بيتداري في زعبوط
علي إيه يا ابني إنت وهو
الكل في لحظة محطته جاية
سايب ومفارق بالموت
طب توت توت
إوعي تقرب إوعي تجرب ولا تفوت
أصل هناك في لمة وعركة
سنجة ومطاوي ونبوت
ما هو أصل النفس بجد رخيصة
وبقينا ديابة في دنيا أسود
ودا هم ووشم بقي معلم في وشوش منحوت
توت توت
فرعون متفرعن بالجبروت
وغلابة جنب الحيط ماشيين
يئلش يقفش . برا بيضحك جواه مجلوط
ويادوب بيشب وماجابش العشرة
غلبان متهان متلطش قلمين علي شلوت
خلص الكلام
طب هوس سكوت
