فوبيا لقا

57

هاني آدم

أنا مكمل حياتى عادى

ما بين مشغول و بين فاضي

لا بطلت السجاير خوف على الصحة

و لا بزهق من الكحة

إذا جابوا سيرتي ناس تانيين

لا واقفة حياتي فى بعادهم

و لا بسأل في يوم عنهم

و لا فاكر إيه اللى شدني ليهم

و لا مهموم و باتحسر

و عارف إن أنا مقصر

لكن دايما بحاول أكون

مجاز بيحركه المعنى فى سبيل الحب

و الغفران

عارف إن أنا مقصر

أنا إنسان

ساعات يغلط ساعات بيتوب

ساعات بيزعل المحبوب

ساعات بيذل نفسه و يرفع الواطى

و بيطاطى عشان لقمة

و بيعدى بمائتين أزمة

و تفضل رأسه مرفوعة عشان الرب ما خلقنيش

كيان فاضي

بتيجي عليا كل الدنيا و تعادي

و لسة مكمل المشوار

لا بطلت الخناق علشان كلام فاضي

و لا الشعر اللى بيكسر جينات روحي

فى سطر حزين

منين

جايب يا قلبي كل جبروتك

و صبرك ع الوجع و الويل

سبيل شرب الغريب منه و قال شكرا

و لما حبيبى داق طعمه

مشى و هاجر

و لسة مكمل المشوار

ما بين ناهي و بين آمر

و بين مأمور بحفظ العهد و التواشيح

خلاص روحي اللى تعبت

من آيات البعد

و التسابيح

سابت فى القلب فوبيا لقا

و فوبيا فراق

و نص جريح

إقرأ أيضاً:

لك مني سلامي

و قبلت أكونلك موعظة

 ألن تأتي؟ 

قد يعجبك ايضآ