عربية
عادل زوين
طيب بص بقولك إيه
أصدق ولا بجد أكدبها؟!
لو هكتب بالصدق هقول
إن المبلي كما البهلول
وإن مشاعر حب مهول
تقلب غول
لما بعقلك ده تحسبها
واحد زائد واحدة غريبة
ولا يمكن نصبح تركيبة
هي علاقة حقيقي مريبة
والأفضل ليك إن تسيبها
باعت ؟ طب ما هي كانت بايعاه
اشمعني إنت تحس إلاه
نسيت حبك؟!
طب ماهو هوَّ كمان نسياه
مش هتناسبك أوتناسبها
طيب نكدب بقي من نفسي
أصلاً هي حياتي وأمسي
تفهم صمتي ونطقي وهمسي
و بدوس فعلًا وبعذبها
تلقاني غزالة ومشتاقة
لو نتأخر تبقي خناقة
أقدر أقول هي الحراقة
ودمي في قلبي أهو مسرسبها
لما يكون المخ في راسي
وأبقى الصادق أوي والراسي
ما بلاقي في طريقي مراسي
الا هموم اوصالي تاعبها
لكن وأنا كداب برتاح
كدبي بيكتم بعض جراح
تسلك تبقي كما البرياح
وتهد السكة وأكركبها
العربية اللي وصفناها
كانت في الأول حلو صفاها
بس خلاص ما بقتش تساعد
هي حديده ومش هعاتبها
بس سؤالي الليلة إزاي
هنبيع ذكري طريق مع شاي
جبت عليها كتير ولكني
مش برتاح إلا أما أركبها
طب دلوني أجيب مرسيدس
والكورسيدا الغالية أسيبها؟
إوعى تكون مستغرب قولي
أصل العشرة كمان ما تهون
عشنا كتير مع بعض قولولي
تقدر ست تبيع الهون
لما تعاشره ما أضحى حبيبها
