لو هتكلم أنا على اللمة
محمد عبد العزيز رمضان
لو هتكلم أنا على اللمة
أنا هتكلم عن حكاويها
قصة بابا وماما وجدو
هما حياتي كدا هحكيها
كنا بنصحى نقوم نتوضى
على صوت بيقول قوم صليها
اصحى يانايم سيب التوهه
ولأشغالك روح أديها
كانت ماما بتعمل لقمة
حلوة هنية نفطر بيها
نسمع صوت الراديو يجلجل
وعلى الساعة نبص عليها
علشان كنا نخاف نتأخر
أصل ورانا حاجات ننهيها
كنا بنفرح من جوانا
مشاكلنا بسرعة نصفيها
أصل قلوبنا كانت بيضا
بس خلاص الله يهديها
كل اللمة خلاص كدا ضاعت
حتى جراحنا مين يداويها
كله يقول مش عارف مالي
هم وحزن كتير يشكيها
طب ليه نشكي ممكن نقدر
نرجع تاني أحزان نطويها
نسأل كدا على كل أحبابنا
ننسى أطماع وشرور نرميها
نفسي اللمة تعود من تاني
بس خلاص تاهت خطاويها
لو هتكلم أنا على اللمة
نفسي بجد تعود من تاني
نبني نعمر جوا قلوبنا
ونعيش بكرا بخير وأماني
نتمنى الفرح لبعضينا
وما فيش بينا غيور وأناني
بس خلاص الكل اتغير
واتهدت جوانا معاني
بعد ماكان الحلم صغير
فجأه اتحول وحش أذاني
وانت يا لمة في يوم جمعتنا
ليه سبتيني وحيد وحشاني
دوشةوعتمة وتوهة وضلمة
عايشه معايا ومش سايباني
روحي كفايه خلاص وسبيني
وانت يا لمة تعالي وباني
إقرأ أيضاً:
