” توجهات القنوات السنة دي مختلفة”… هشام جمال عن تأجيل “عالم موازي”

هاجر زينهم

كشف الفنان “هشام جمال” لقناة الحياة، عن سبب تأجيل مسلسل عالم موازي من العرض حيث كان من المفترض أن يعرض خلال رمضان 2021.

قال “هشام”: “مسلسل عالم موازي تأجل في المرة الأولي عشان بسبب مرض الأستاذ سمير غانم والفنانة دلال عبدالعزيز ربنا يرحمهم، ودنيا وأنا أتعديت و10 من الفريق، وساعتها عشان نكمل المسلسل بنينا الديكورات للمسلسل بالكامل على أمل أن أول ما نخف إن شاء الله ننزل نكمل التصوير وكانت تكلفة كبيرة”.

وتابع “هشام” حديثه قائلاً: “لكن المرض طول وأستاذة دلال فضلت مدة طويلة في المستشفى، وبما رمضان خلص هدينا كل الديكورات، وقررنا أننا نأجل للسنة اللي بعدها”.

واسترسل “هشام” كلامه: “حصل تغيرات وتوجهات للقنوات وفي طلباتهم في المسلسلات اللي بتتعرض، من ضمنها مبقاش مطلوب السنة دي مسلسلات 15 حلقة، ونلاحظ أن القنوات on, dmc, cbc، والحياة مفيش فيها مسلسل 15 حلقة”.

وأكد “هشام” تعاقده مع الشركة المتحدة قائلاً: “إحنا كنا متعقدين بالفعل مع الشركة المتحدة على مسلسل عالم موازي، ولكن مفيش مسلسل تاني 15 حلقة يكمل عالم موازي، زي السنة اللي فاتت كان في يوسف الشريف 15 حلقة ودنيا 15 حلقة، لكن السنة دي مفيش ولا مسلسل 15 حلقة”.

وعن الحلول المتاحة، قال “هشام”: “كان أمامنا حل من اتنين أن 15 حلقة يكملوا ويتعرضوا خارج رمضان، وهنا في نقطة أن المسلسل تكلفته كبيرة جدًا بيكون رمضان هو الموسم المناسب له، وطبعًا أنا عندي أكبر ضرر مالي لأني مخرج والمنتج عالم موازي، وفلوسي متعطلة بقالها سنتين”.

وأكمل “هشام”: “كلنا مضايقين أن المسلسل متأجل وعمرو وهبة هو مؤلف عالم موازي وفي بيتنا روبوت، وبطل في عالم موازي أمام دنيا سمير غانم، وبطل من ضمن 4 أبطال بمسلسل في بيتنا روبوت، وكمان شيماء سيف بطلة في المسلسلين، لكن ظروف ومتطلبات السوق السنة دي وضعتنا أمام الخيارين دول اللي هما ننزل بعد رمضان أو نكمل باقي الحلقات”.

وكشف “هشام عن محاولاته لحل الموضوع، حيث قال: “عرضت على دنيا أننا نكمل المسلسل عشان يبقى 30 حلقة، ولكنها رفضت وأنا مقدر طبعًا حالتها النفسية والجسدية، وكانت بتقول أن قدرتها أنها تكمل 15 حلقة فقط وأكتر من كده مش قادرة دلوقتي، دنيا عشرة 10 سنين وأكتر من أختي وأكتر فنانة موهوبة في الغناء والتمثيل والاستعراض، مكرس شغلي لدنيا سمير، وأغلب إنتاجنا لشغل دنيا على مستوى المسلسلات والمزيكا والحفلات ومؤخرًا الأفلام”.

 

وأنهى حديثه قائلاً: “عمري ما هضغط عليها أو أروح لها في وقت صعب عندها، وأستاذة دلال عبدالعزيز أنا بحبها جدًا وهي دعمتنا بمسلسل في بيتنا روبوت ودي حاجة مش ناسيها، ودلوقتي بنشوف إيه الحل المناسب عشان المسلسل ينزل إن شاء الله سواء في رمضان أو خارج رمضان، أو على منصة”.