محمد صلاح: “هشتغل بحاجة لها علاقة بالكرة أو أكون رجل أعمال”

هاجر زينهم

حل أمس الخميس اللاعب العالمي “محمد صلاح” ضيف في برنامج صاحبة السعادة للإعلامية إسعاد يونس.

رؤية وطن ترصد لكم أهم تصريحات “محمد صلاح” خلال الحلقة:

وعرضت “إسعاد” فيديو عن ردود أفعال الناس في كل المحافظات عن محمد صلاح.

وعلق “صلاح” عن ذلك قائلاً: ” مفيش كلام أقدر أقوله يوصف إحساسي بالفرحة أن الناس عندهم أمل شايفين حد من عندهم قدر يعمل حاجة مختلفة”.

وتابع “صلاح” قائلًا: “الأطفال أو الناس اللي عندها إعاقة أن يبقى عندهم أمل أنهم يقدروا يوصلوا لأي حاجة هما عايزين يوصلوا لها وده بالنسبة لي كان هدف من أهدافي في الحياة إني أغير حاجة معينة أو أعمل حاجة معينة في مصر “.

واستكمل “صلاح” حديثه: “أن الناس تبقي شايفة أن حد من عندهم وصل لمكانه معينة يبقى إحنا كمان نقدر نوصل “.

وعن بدايته للعالمية قال: “من لحظة خروجي من المقاولين وأول ما سفرت سويسرا الموضوع كان صعب عليا لأني كنت لا اتكلم الإنجليزية وتعاملي مع الناس كان قليل “.

“وأنا من النوع اللي بيفكر كتير عشان عايز أبقى أحسن فقعدت مع نفسي بعد شهر أو شهرين من سفري، وفكرت أنا عايز أرجع مصر زي أي حد سافر شهرين ورجع ولا عايز أعمل حاجة مختلفة”.

“قررت أعمل حاجة مختلفة عن أي حد فشوفت المصريين اللي خرجوا من مصر وكملوا ولكن لم يصلوا للعالمية، وبدأت اتفرج على فيديوهاتهم والأنترفيو وكل حاجة عملوها، وبدأت أركز على التنمية البشرية عشان أطور من نفسي “.

وتابع “صلاح” قائلاً: “لو رجعنا لعشر سنين وسألنا الناس في مصر هل تتوقع حد من مصر ينافس على أحسن لاعب في العالم هيقولوا لا، لكن حالياً هيقولوا آه ليه لأ لأن في حد وصل وده الهدف الرئيسي في الحياة بالنسبة لي”.

وقالت “إسعاد” لصلاح: “بما أنك عملت 17 مليون أنترفيو مع رجال، الستات اللي في مصر بتسأل هل تعتني حقاً من والدة مكة، لأنها أصبحت أيقونة عظيمة وقدوة؟.

أجاب “صلاح” قائلاً: “ماجي على طبيعتها ست مصرية مش بتظهر كتير ولكن في الفترة الأخيرة بدأت تظهر بشكل ملحوظ”.

واسترسل حديثه عن زوجته ماجي قائلاً: “مهما تحدثت لن استطيع أن أعطيها حقها، هي أكثر واحدة تعاني معي في ظل الأحداث التي أمر بها، وأغلب الأوقات بكون في النادي، وبالتالي هي تعتني بالأطفال “.

وعن بداية علاقة صلاح بماجي قال: “إحنا من بلد واحدة وكنا بنلعب لعبة أسئلة البنات لوحدها والشباب لوحدهم ولكن علاقتنا بدأت أننا طوال الوقت في خناقات، ولكن اتعرفنا على بعض وإحنا في الجامعة، واتكلمنا سنتين وبعدها أرتبطنا بشكل رسمي،

سافرت سويسرا وقبل ما أمضي في تشلسي كنا قررنا أننا نتزوج، كان وشها حلو عليا وبعد زواجنا ذهبت لتشلسي”.

وأكمل حديثه عن ماجي قائلاً: “ماجي أهم ضلع في حياتي، طبعها هادي علاقتها بالسوشيال ميديا ضعيفة، هي من النوع اللي بتحب تقفل على نفسها أكثر وهي عارفة طبعي أنا مش بحب أعمل ضجة انا بخلص شغلي في النادي بعمل لقاء بلعب مبارايات في هدوء تام”.

أنا عن ابنته مكة قال “صلاح”: “مكة بتحب تتكلم معانا عربي على طول ولكن أحياناً بتتكلم إنجليزي معانا، ولكن أول ما تلاقي حد عندي في البيت بتتكلم عربي على طول “.

وعلاقة صلاح بالمطبخ قال: “بعمل الفطار بيض بالأفوكادو وأيضاً الشوفان ولما كنت في سويسرا كنت بطبخ لوحدي ولكن دلوقتي ماجي بتساعدني”.

وقال: “لما بنزل مصر وقت المنتخب أحياناً أكل فول وطعمية “.

وعن أسماء بناته قال “صلاح”: “قبل الزواج ماجي كانت مختارة اسم مكة لبنتنا وهي اختارت أيضاً اسم كيان “.

وأما رأيه في ابنته كيان قال “صلاح”: “كيان شخصيتها قوية جداً بتتعلم من مكة، ومكة عايزة تبقى هي اللي مسيطرة على البيت كله ولكن مكة بتغيّر شوية من كيان”.

وعن حياته في الخارج ومدى تأقلمه هناك، قال “صلاح”: “بحب اتأقلم مع أي بلد بعيش فيها، عشان تنجح في مكان معين لازم تتأقلم وتعرف إيه اللي بيحبوه واللي بيكرهوه، غير كده مش هتعرف تتعامل معهم”.

“وبنسبة كبيرة تأقلمت على طبيعة الأجانب وفاهم حياتهم مش 100% ولكن بنسبة كبيرة”.

وعن رأيه في شخصية مكة، قال “صلاح”: “مكة عندها طاقة كويسة عايزة تلعب طول الوقت ومش بتحب تنام، شخصيتها قوية وعنيدة ولما بتكون عايزة حاجة بتعرف تاخدها، ودي حاجة بتبين أنها في المستقبل لما يكون عندها هدف هتفضل وراه لحد ما توصل له، وهي أخدت صفاتها مني أكثر من ماجي”.

وعن قراره بأن ماجي تأخذ الحذاء الذهبي بدلاً منه قال “صلاح”: “أنا وماجي كنا في حفل تكريمي بالحذاء الذهبي، وأنا طلبت منها تأخد الجائزة لأنها مش بتظهر كتير معايا، فكانت حاجة مهمة بالنسبة لها أنها تطلع تأخد الجائزة، ولكنها كانت متوترة جداً وده دوري اني اخليها تظهر معايا”.

 

وقال “صلاح”: “وبالنسبة للنتائج أنا اتصدمت لعدم وجود اسمي ولكن مش بحس بنظرية المؤامرة ولا أعلم على أي أساس يتم الاختيار”.

 

“تفاجأت إني مش موجود بقائمة الفيفا، ولكن الناس قالت إني المفروض أكون موجود بالقائمة والعالم تعجب إزاي مش موجود، وده بالنسبة لي أهم حاجة، ولكن it’s not fair “.

وعن حملته الإعلانية ضد المخدرات أكد “صلاح” قائلاً: “أفضل حاجة إنك تغير حياة الناس للأفضل وبالنسبة لي هما دول الأبطال اللي بجد”.

“واحد بيمر بتجربة كبيرة الإدمان مش عارف يخرج منه وفجأة يأخد قرار أنه غير حياته وده بالنسبة لي محتاج مجهود غير عادي ودول ناس نفتخر بهم وأنا بقول لكل واحد فيهم أنت بجد فخر لنا كلنا إنك قدرت تتحدى نفسك”.

أكدت إسعاد يونس أن الإقبال على مراكز علاج الإدمان زاد بنسبة 400% من بعد الحملة محمد صلاح وهذا معناه أن في ناس كثيرة برأت ورجعت للحياة.

أكد صلاح أنه من لحظة ما بدأ بأول حملة إعلانية كان يتابع الأرقام بالنسبة لمراكز علاج الإدمان ونتيجة الإعلان، وقال: “كل سنة بعمل إعلان أتمنى أني أفيد الناس وأكون سبب في تغير حياة الناس للأفضل”.

وعن صوره في كل مكان قال “صلاح”: “وأنا صغير لم أحلم يوماً أن صوري تُرسم كاريكاتير وجرافيتي، ولكن مع الوقت ولما كبرت حسيت إني محتاج اشتغل على نفسي كتير وعلى صورتي خارج الكرة”.

“موجود في كل مكان بشكل مش لاعب كرة فقط ولما بشوف صوري بحس إني تعبت واشتغلت على نفسي كتير بتحفزني إني أفضل أشتغل طول الوقت”.

وقال “صلاح”: “في الوقت الحالي إحساسي إني عندما أنتهي من الكرة هشتغل حاجة لها علاقة بالكرة أو أكون رجل أعمال”.

وأكد “صلاح” قائلاً: “لا أعتقد أن مكة وكيان هيعانوا من صدمة ثقافية بعد نزولهم لمصر، لأنهم من فترة لأخرى بينزلوا البلد أو القاهرة يشوفوا أهلي، وبالتالي هما قريبين من كل حاجة مصرية وخاصة مكة”.

وعن أكلته المفضلة قال “صلاح”: “بحب السلطة مع سمك أو فراخ وممكن أرز أو بروكلي، وبحس بالذنب لما بأكل فطير ولو أكلت معه كشري يبقي اليوم قفل”.

وتابع حديثه قائلاً: “آخر مرة كنت في مصر أكلت الصبح فطير وفي الغداء أكلت حمام وبالعشاء أكلت كشري، وعشان كده اخدت الشهر كله مفيش أي حاجة بأكلها، أنا مش بضعف أمام الأكل”.