عبدة بكري أحد أبطال مسرحية حلم جميل في حوار خاص مع رؤية وطن
حوار منار عبد الناصر
فنان شاب ومُتميز، عشرة طويلة مع المسرح ويتآني دائمًا في خطواته
الفنان الشاب عبدة بكري أحد أبطال مسرحية حلم جميل حيث أن دوره في المسرحية لم يقتصر علي كونه مساعد مُخرج وحسب بل تعددت أدواره داخل المسرحية
وكان لرؤية وطن حوار خاص مع عبدة بكري
عرفنا بنفسك ؟
أنا عبدة بكري محمد طالب في أكاديمية الفنون وبشتغل في مسرح الدولة في المسرح الكوميدي بطولة سامح حسين.
كلمنا عن كواليس المسرحية من حيث التحضيرات والاستعدادات؟
احنا كنا بنحضر للمسرحية دي من يناير اللي فات واخدت تحضيرات مننا حوالي 4 شهور
واستعراضات الرقص من تصميم الأستاذ ضياء شفيق والمسرحية إخراج أستاذ إسلام إمام، ديكور حازم شِبل، أزياء نعيمة عجمي، إضاءة أبو بكر الشريف، مزيكا هشام بكر وأشعار طارق علي.
بالنسبة لأنك كنت بتلعب بطبقات صوتك في المسرحية هل سبق وتم التدريب على ذلك أم هذه طبيعتك؟
لأ أنا اساسًا مساعد مُخرج في العرض ده وعشان احنا هنا فـ سفر فـ اللي بيلعب الدور ده عنده امتحانات وكده فـ أنا كنت بلعب الدور مكانه فـ أنا يعتبر ستاند باي للي بيلعب الدور ده مش ممثل.
حدثنا عن الفنان سامح حسين؟
هو حد خلوق جدًا يعني اللي بتشوفوه على الخشبة ده هو فعلًا اللي في الكواليس يعني هي دي طيبته وأخلاقه وهو بيتعامل معانا حتى في المشاهد معانا مفيش بقى تتعامل معاه على إنه هو نجم لا هو واحد مننا.
هل بتلاقي نفسك في المسرح ؟
أنا بمثل مسرح من حوالي 7/8 سنين وبسعى اني اخد خطوة الميديا بس لسة مش مستعجل عشان أنا بحب المسرح وبشتغل مساعد مخرج وبرقص وبمثل وعايش فـ المسرح وبحب مرمطة المسرح يعني هي بتبقي بالنسبة للناس مرمطة بس هي بالنسبالي حب.
ما رأيك في قنا ؟
جميلة جدًا وسافرنا الاقصر وكانت جميلة وجينا قنا والناس اللي بتتعامل معانا ناس محترمة يعني كل حاجة احنا كنا مرتاحين فيها سواء في الأكل والإقامة كنا مقيمين في قصر ثقافة الأقصر حاجة بجد روعة ومش كلام وخلاص بس كل ما أقابل حد من قنا جدعنة من كل حد حتي في الشارع وحتي ناس هنا في القصر بيعرفوا إننا من المسرحية واخر كرم حتي في الشارع الناس بتعرف إننا من القاهرة وبيبقوا عايزين يعملوا كرم الضيافة.
