صباح الخير
كتب : هاني آدم
صباح الخير يا جمهورى
صباح النور على المكسور
صباح الجبس لما يكون
أحن من البشر ع الجرح
يا مستنى العوض و الفرح
فى محطة وصول ضلمة
عاشق بيغنى للبيضا و للسمرا
و مش لاقى نفسه فى عيونهم
و لا جنونهم
و مش لاقى نفسه فى اللمة
مؤذن لسه مااتوضاش
و ساعى بريد
ما جالهوش أى مرسال من حبيب غايب
يا شايب لسه مستنى الليالى تعود
حدود المعصية بتفرض قانون البعد
يا محتار بين سما و بين أرض
مجهز ليه شنط روحك
و بوحك للعيون السود
ما سابش لأى شاعر فرصة يتشعبط
فى حبل الوصل و الأحلام
و لا ينام تحت شباك قفلوه بالجنزير
و تحت سرير
سعادتك ييجى ألف كتاب
كتبهم ناس كتير قبلك
فاقوك هبلك و أشجانك
كتبهم حد علشانك
و كانوا فاكرين
تعبهم جاب نتيجة و غير العالم
زرع فى قلوب دعاة الشر ترنيمة
و لون عتمة التوهة بوعود و حنين
سنين و الكل فاكر نفسه
وحده الفاهم الفولة
قوالته مفيش سواها قولة
حكايته هتفضل الأغنية و المذهب و نور الفجر
بعد ليالى فيها الحلم متكدر
يا كواببس كل ما أهرب منها تلحقنى
لا عارف أحبسها فى سطورى
و لسه يا ناس ما جاش دورى
عشان ألم اللى فاضل منى
فى كتاب يبهر القارئ
و يوصل للقلوب زاحف
يدب خناقة مع عقل اللى بيفكر
و يستفسر و يتمنى
لا يمكن كلمة تتغنى
صاحبها ما داقش طعم النوم
و كل اللوم على ودانكم
على عقولكم
على التقصير
فى حق الجاى و الحاضر
و حق ولادنا
بعد ما كلنا نسافر
يا ترى هنسيبلهم دنيا تليق بيهم
أغانى تمس إحساسهم
و ترقيهم
كتب تنفع ورق طعمية
أو سحارة تحت سرير
صباح الخير