رؤية وابداع
محلك سر
هاني آدم
محلك سر
و حافظ السر
و محدش حافظ اسمك
و لا قصيدة واحدة م اللى عصرت
فيهم كل أشجانك
عبيط فاكر الزمن شواف
و جمهور القلم مستنى فى ديوانك
و عامل فيها أبو الثوار
حالف على تار
خدوا العزا فيا كتير غيرك
يا تقصيرك
فى حق الواد
و أخوه و أمه
و أمك قبل أبوك و إخواتك
كبيرهم راح
فى سكة نفسى أكون و ما كانش و لا جايز
يكون يوم حر
محلك سر
يا عينى على حبة القمح اللى زرعوها
فى سطور بارده
و قطعوا الميه لما قالتلهم عطشانه
بلوا الريق
و ١٠٠ مليون خسارة بتحسب المكسب
عدد توابيت
غرام أفعى انتقم من بكر مغصوبه
يا بوبه الميه مش هتكفى غسل الواد
و لا هتمحى الفضيحةو الذل
يا زى الفل
أبيض بس ميح تماسيح
خدوا الحبه اللى فاضلين أكل للعصفور
و ألف طابور
بيشهد ع المرض و الظلم و الأشجان
عامل ندمان و ماسك لسه فى التوبه
و ذنبك كلمة معطوبة
فى موال ذكر
إقرأ أيضاً:
هل تأتي؟
متلازمان
مفتاح القلب
إتبعنا