موز مُفتَخر وأصله جزر
بقلم :سلوي صبح
نماذج كتيرة في دنيا عجيبة
ناس غريبة ويادي المصيبة
بشر في الحقيقة بتنكِر أصولها
تشوفهم تقول..
يادي الحلاوة ..موز مُفتخَر..
وأصله جزر..
وشوشهم رتوش وبوية وروچ
وحبة ديكور فوق العيون
إشي أحمر وأخضر..
وطمس الوجوه أصبح فنون
وَيَا دي الجنون في دنيا البشر..
جزر مفتخر ونفخ وبوتكس
وإيشي فيلر..
وتغسل وجوهها يا حسرة قلوبنا
تشوف العِبر..
لون العينين بقى مختلف
وحتى الرموش..
راحت في خبر..
بياض الوجوه أصبح سواد
ظلام وانتشر..
مالها الطبيعة وخِلقة ربك
لازم يبقى شكلِك زي الصنَّم
ضياع المعالم وذكرى
مرِّت بقلبِك في يوم
لما كنتِ سعيدة..
ولحظة حزينة لفرقة حبيب
وخوف م القدر..
وطول العمر..
خطوط الزمن دي ملامح حياة
ونعمة إله في دنيا البشر..
جمال الحياة في رضاكِ عن
شكلِك وذاتِك..
كفاية تمرد ضياع وتشرد
في زحمة ظروفِ..
قاومي خوفك ..
وعيش الحياةً محطة محطة
وكل محطة جمالها حضر..
ولما هترضي هتبقي ماشا الله قمر.
بالعامية بقول.
