بفتكر

بقلم بيشوي مجدي

ريحة شياط روحى نتيجة انى حارق
ذكرياتى كلها مخليانى
فى كل وقت بكون لوحدى
بفتكر..
أيام ما كنتى موجودالى
و كنت انا مرتاح عشان
كنتى الأمان..
و الدنيا بعدك حزن صافى وكل عام
بيفوت عليا ببتسم..تعبير مجازى اكمنى بضحك م الوجع
و دموعى نازلة كإنها بالبُعد خام..
كنا ف شوارع و ف حوارى نرتجل
أجمل حكاية و الف قصة عننا..
تحت المطر نرقص كتير
ونعيش كإن العمر لحظة بس لسه ما انتهتش..
نقعد ف ركن ف قهوة عادى او رصيف..
ناكل خفيف..
او حتى نصرف للمفيش
كنا نعيش..
و كإننا لوحدنا ف الكون بحاله
يا حبيبتى انتى جمالُه وكل شئ
ونتى الطريق للمنتهى
و المشتهى..
و كل غنوة بدأتها..
و حفظتها عن ظهر قلب..
الدنيا نوتة ولحن متغلف حنين
وانتى الالات والمعزوفات
ونتى الدقايق والسنين..
كنتى لقلبى عكازات
تسند لى روحى م الشقوق
كنتى الموارد والفروق
كنتى و مازلتى رغم إنك مش هنا
ورغم إنى بفتكر كل اللى فات
وبعيش عليه..
أنا لسه مش عارف أشيلك م اللى جاى
بطرح فراق واجمع لُقا بس ف خيالى
والحقيقة انى بفوق ونا كلى شوق
على وِحدة قاتلة و مُتعبة
.. فكرة غيابك مرعبة
عمال بحاول انى اعيد ..كل الشريط
بس المحاولة للاسف..ويا 100 خسارة ..
يخسرها قلبى فـ كل مره مهما عاد
.. والعمر سف وهمه زاد
كل الحلول صعبة و عنيدة
والسكك متقفلة
ولكنى لسه ما يأستش
لسه تانى ببتكر
وف كل وقت بكون لوحدى
بفتكر ..